15 iyun tarixində, saat 18:00-da 400-dən artıq abiturient milli
imtahanlardan əvvəl riyaziyyat testindən keçəcək.
Onlayn test imtahanını “Yeni Düşüncə İnstitutu” “Açıq Cəmiyyət”
fondunun maliyyə dəstəyi ilə həyata keçirir. “Yeni Düşüncə
İnstitutunun” təsisçilərindən, Kamran Əfəndiyevin bildirdiyinə
görə, Azərbaycan dilli abiturientlər üçün bu fəallığı artıq iki
ildir həyata keçirirlər və istəyi olanların sayı hər il artır.
“Bu motivasiya göstəricilərindən biridir. Abiturientlər
həqiqətən çətinlik çəkir, hələ ki, qapalı məkanda lap çətindir.
Kəndlərdə müvafiq şərait əlçatan deyil. Marneuli, Bolnisi, Dmanisi,
Qardabani, Tetritskaro, Kareli, Telavidən, demək olar Gürcüstanın
etnik Azərbaycanlıların məskunlaşdığı bütün regionlarından
qeydiyyatdan keçiblər. Biz dörd ildir ki, icma mərkəzimizdə
abiturientləri hazırlayırıq. Ancaq saya görə məhdudiyyətimiz var.
Ona görə də ötən il və bu il düşündük ki, bərabər imkanların olması
üçün daha çox adama kömək edək.”
Testdən keçmək üçün qeydiyyatdan keçmiş, vahid milli imtahanlara
hazırlaşan abiturientlərin elektron ünvanına suallar göndəriləcək.
İmtahan onlayn qaydada, 1 saat 30 dəqiqə davam edəcək. 40 suallıq
test riyaziyyat müəllimi, Marneuli sakini Elvir Həsənoğlu
tərəfindən hazırlanıb. İmtahan bitdikdən sonra testlər yoxlanılacaq
və abiturientlərə öz nəticələri bildiriləcək.
Qeyd etmək lazımdır ki, 2021-ci ilin vahid milli imtahanları 1 iyul
tarixində gürcü dili və ədəbiyyatı imtahanı ilə başlayacaq.