Bu gün, 29 iyul tarixində, “Gürcü Arzusu” Marneuli meri vəzifəsinə
namizəd olaraq Kənan Ömərovu təqdim edib.
“Marneuli” radiosu mer vəzifəsinə namizədlə müsahibə yazmaq və onun
hansı planlarının olduğu barədə məlumat almaq üçün partiyanın
qərargahına getdi. Ancaq Kənan Ömərov indiki mərhələdə müsahibə
verməkdən imtina etdi və vəd verdi ki, növbəti günlərdə mütləq
gələcək planları barədə danışacaq.
Marneuli Bələdiyyə Məclisinin sədri və “Gürcü Arzusu”-nun Marneuli
seçki qərargahının rəhbəri Amiran Qiorqadze “Marneuli” radiosu ilə
söhbəti zamanı bildirdi ki, Kənan Ömərov partiyada namizədliyi
müzakirə olunan yeganə şəxs idi.
“Bilirsiniz ki, təxminən iki aydan sonra – 2 oktyabr
tarixində yerli özünüidarə seçkiləri keçiriləcək. “Gürcü Arzusu”
Marneuli bələdiyyəsində mer vəzifəsinə namizəd olaraq cənab Kənan
Ömərovu təqdim etdi. Kənan illər ərzində Təhsil Resurs Mərkəzinin
rəhbəri olub, tanınmış simadır və bilirik ki, bizim əhali onu çox
dəstəkləyəcək. Buradan irəli gələrək, Marneuli meri vəzifəsinə
namizəd olaraq seçim onun üzərində dayandı”, – Amiran
Qiorqadze bildirdi.
Kənan Ömərov Marneuli merinin müavinidir. O, müavinliyə qədər
Marneuli Təhsil Resurs Mərkəzinə rəhbərlik edirdi.