Marneuli bələdiyyəsinin ictimai məktəblərində koronavirus halları
artıb.
18 oktyabr tarixinə olan statistikaya görə, Lejbəddin kənd ictimai
məktəbi bağlanıb və distant rejimə keçib. Marneuli bələdiyyəsinin
daha üç məktəbinin bəzi sinifləri də onlayn rejimə keçib. Yerli
Təhsil Resurs Mərkəzindən “Marneuli” radiosuna bildirdilər ki,
Lejbəddin məktəbində yoluxma riski olduqca yüksək idi və məhz buna
görə, qərar veriblər ki, 166 şagird və 34 nəfər heyət üzvü tamamilə
distant rejimə keçirilsin.
“Yoluxanlar demək olar ki, bütün məktəblə təmasda olmuşdular.
Direktor, işləri aparan şəxslər, məktəblə tez-tez əlaqəsi olan
adamlar. Ümumilikdə dörd müəllimdir. Yerli İctimai Səhiyyə Mərkəzi
belə tövsiyə verdi ki, 12 gün ərzində bütün məktəb distant rejimə
keçirilsin. Beş, altı saylı və Tsereteli ictimai məktəbində də
koronavirusa yoluxma halları qeydə alınıb. Beş saylı ictimai
məktəbdə iki müxtəlif sinfin şagirdləri yoluxub. Tseretelidə isə
müəllim, altı saylı məktəbdə də müəllimlər yoluxub”,
– Marneuli Təhsil Resurs Mərkəzinin nümayəndəsi İrma Davadze
bildirdi.
Marneuli bələdiyyəsi miqyasında fəaliyyət göstərən 74 ictimai
məktəbdə 4 oktyabr tarixində tədris ili sinif otaqlarında başladı.
Yeni tənzimləmələrə görə, məktəbdə hamı maska taxmalıdır.
Təhsil və Elm Nazirliyi valideynlərə distant təhsil qaydasını
seçmək şəraiti də yaradıb. Risk qrupda olan müəllimlər isə
istədikləri halda dərsi distant qaydada keçə bilərlər.