Gürcüstanda yaşayan müsəlmanlar bəzən dini məkanların tikilməsində
müəyyən qadağalarla, çətinliklərlə, maneələrlə üzləşirlər. Mən
aidiyyəti qurumlardan və səlahiyyətli şəxslərdən xahiş edirəm ki,
bu məsələdə anlayış göstərsinlər.
Bu sözləri Bütün Gürcüstan Müsəlmanları İdarəsinin şeyxi Hacı Ramin
İgidov 18 aprel tarixində Marneuli meriyasının təşkil etdiyi iftar
süfrəsində dedi.
Onun sözlərinə görə, hər zaman Gürcüstanda islama və müsəlmanlara
qarşı hörmət nümayiş etdirilir.
“Mən belə gözəl iftarın təşkilinə görə, cənab merə və
hökumətimizə öz təşəkkürümü bildirirəm. Neçə illərdir ki, Ramazan
ayında ənənə halını alan bu cür iftar süfrələri təşkil olunur.
Bölgələrdə silsilə şəkilində bu cür iftar süfrələri açılır.
Gürcüstanda islama və müsəlman həmvətənlərə qarşı hörmət nümayiş
etdirilir. Eyni zamanda təşəkkür edirəm ki, sağlam İslam dinin
yaşaması üçün müəyyən vəsait ayrılır. Və müsəlmanların öz dini ayin
və ibadətlərinin yerinə yetirilməsi üçün lazımı şərait yaradılır.
Ancaq nəzərinizə bir şey çatdırım ki, bizi və burada yaşayan
müsəlmanları narahat edən bir məsələ var. Bu da məscidlərin
tikilməsi ilə bağlı və eyni zamanda dini təhsil ocağı ilə bağlı
olan məsələlərdir. Belə ki, Marneulidə, Bolnisidə, Dmanisidə,
Qardabanidə və digər bölgələrdə yaşayan müsəlmanlar bəzən dini
məkanların tikilməsində müəyyən qadağalarla, çətinliklərlə,
maneələrlə üzləşirlər. Mən aidiyyəti qurumlardan və səlahiyyətli
şəxslərdən xahiş edirəm ki, bu məsələdə anlayış
göstərsinlər”, – Ramin İgidov dedi.
İgidovun dediyinə görə, məsciddən çəkinmək lazım deyil, əksinə
insanların ibadət etməsinə ehtiyac var.
“Məscidlər insanları doğru yola gətirmək üçündür.
Məscid və dini tikililərin izni məsələsi təbii ki, meriyadan əlavə
başqa orqanlara da bağlı olduğu üçün çox gecikmələr olur. İstəyimiz
budur ki, buna anlayış göstərsinlər. Doğrudan da məsciddən çəkinmək
lazım deyil. Əksinə, yerlərdə yaşayan insanların dini inanclarının
rahat şəkildə yaşamaları üçün onların ibadət etmələrinə ehtiyac
var. Bu vətəndaşın təbii haqqıdır. Şərait yaratmaq lazımdır.
İnşallah ümid edirəm ki, bu problemlərin həlli istiqamətində işlər
görülər”, – İgidov dedi.
Qeyd edək ki, Baş nazir İrakli Qaribaşvili Sovet totalitar rejimi
dövründə ölkənin dini icmalarına dəyən zərərə görə 2022-ci ilədək
ödəniləcək məbləğin 1 milyon lari artırılaraq 4,5 milyon lariyə
çatdırılması barədə qərar imzalayıb. Bu vəsaitdən 2,2 milyon lari
ölkənin müsəlman icmasına ayrılıb.