“Vahid Milli Hərəkatın” Marneuli Rayon Təşkilatının sədri Azad
Kərimov olub. 21 may tarixində Gürcüstanın 6 bələdiyyəsində
“VMH”-ın Rayon Təşkilatına sədr seçkiləri keçirilib.
Azad Kərimov “Marneuli” radiosu ilə söhbəti zamanı bildirdi ki,
Gürcüstan miqyasında Marneuli bələdiyyəsi seçkilərdə seçicilərin
iştirakına görə, ikinci yeri tutub.
“Bütün Gürcüstan miqyasında 10 000-ə yaxın seçici qeydiyyatdan
keçib. Marneuli seçicilərin fəallığına görə, bütün Gürcüstan
miqyasında ikinci yerə çıxıb. Burada ümumilikdə 1 051 seçici
qeydiyyatdan keçib və buradan 660 seçici məni
dəstəkləyib”, – Azad Kərimov bildirdi.
“VMH”-ın Marneuli Rayon Təşkilatının yeni sədri seçicilərinə
minnətdarlığını bildirib və qeyd edib ki, kəndlərdə əhali ilə fəal
görüşlərə başlayacaq.
“Hələ gələcək planlardan danışmağa tezdir. Mən kənd-kənd gəzirəm və
əhali ilə birlikdə olacağam”, – Azad Kərimov
bildirib.
Kərimovun sözlərinə görə, “VMH”-ın Marneuli Rayon Təşkilatında da
dəyişikliklər planlaşdırılır. O, qeyd edir ki, qadın təşkilatları
açılacaq, çünki indiki mərhələdə partiyaya qoşulan qadınların sayı
azdır.
Marneuli Rayon Təşkilatına sədr seçkilərində iki namizəd, Azad
Kərimov və Eldar Mustafayev iştirak edirdilər.