Marneuli bazarı demək olar ki, təbii fəlakətdən qısa müddət sonra işləməyə davam edib.

Kiçik biznes sahibkarları öz gücləri ilə piştaxtaları palçıq və sudan təmizləyirdilər. Onların sözlərinə görə, məhsullar tamamilə yararsız vəziyyətə düşüb. Satıcılar banklardan götürülmüş kreditlərə görə narahat olurdular. İlk günlərdə onlardan yerli hökumət tərəfindən kömək edilib-edilməməsini soruşduqda onların cavabı “yox” idi. Təbii fəlakətdən iki ay sonra biz satıcıların dəymiş ziyanın öhdəsindən necə gəldikləri ilə maraqlandıq. Məcburi endirimlər mövsümü başlayıb, amma satıcıların dediyi kimi, çoxları xarab olan malı ucuz da almaq istəmir.

• Marneuli bazarı – təbii fəlakətin nəticələri

“Hələ evdə nə qədər qab var, paslandılar. 5-6 gün selin içində qaldıq. Qalan qabların heç birinin qutusu yoxdur. Qutusuz olanları da alan olmur, 25 lariyə satdığım fincanları indi 10 lariyə verirəm. Ət çəkən maşınları, şişlər var idi, hamısı suda qalıb paslandı. Hamı istəyir ki, təzəsini alsın. Bir-iki ay, heç olmasa, yer üçün vergi almasalar, yaxşı olardı. Köməklik olsa, yenə zərər yoxdur. Yalnız bir dəfə vergiyi 260 deyil, 200 lari aldılar. Nə kömək edəcəklər? Bazarda o vaxt 8-9 obyekt yandı, nə kömək etdilər? Qırılan qabların heç sayını bilmirik”, – adının hallanmasını istəməyən satıcı dedi.

Satıcılar bildirirlər ki, qutusuz satılan əşyaları nə qədər ucuz qiymətə satmağa çalışsalar da, alıcısı olmur.

• Marneulidə təbii fəlakət nəticəsində zərər çəkən vətəndaşlara yardım göstəriləcək – Marneuli meri

“Evdə hələ çoxlu sayda qab var. Gətirə bildiyimizi gətirdik, amma sata bilmirik. Qablaşdırmaları olmadan almırlar. Gərək aşağı qiymətə verək ki, alsınlar. Heç köməklik olmadı. Biz zənn etdik ki, verginin vaxtını uzadarlar, ancaq hamısının pulunu aldılar. Deyirlər ki, dəyən zərəri qarşılamaq üçün hökumətə pul köçüb. Amma hələ bizə paylanmayıb”, – Marneuli bazarında işləyən satıcı qeyd etdi.

Qeyd edək ki, 25 may tarixində, gecə saatlarında güclü yağış nəticəsində Algeti, Xrami və Debet çayları daşıb. Marneuli şəhərinin küçələrinin bir qismi su altında qalıb. Həmçinin, bələdiyyənin bir neçə kəndini də su basıb.

• Marneuli bazarında çalışan kiçik biznes nümayəndələrinə heç bir dəstək olunmayıb

Mayın 25-də sel nəticəsində Marneuli bazarının ərazisinə də zərər dəyib. Bazar ərazisində saxlanılan əşyalar və mallara ziyan dəyib və ya xarab olub. Marneuli meriyası itkiləri hesablamaq üçün komissiya yaradıb, ancaq Marneuli bazarında çalışan kiçik biznes sahiblərinə dəyən zərəri hesabladıqları və onlara yardım göstərib-göstərməyəcəkləri bu günə qədər məlum deyil. Marneuli meriyası hökumətin Marneulidən başqa bütün bələdiyyələrə pul ayırdığı ictimaiyyətə məlum olduqdan sonra belə bir bəyanatla çıxış edib. Buna cavab olaraq meriya bəyan edib ki, təbii fəlakət nəticəsində zərər görən infrastruktur layihələri bərpa olunacaq.