1 avqust tarixində Marneuli "Geo Hospitals" klinikasına azyaşlı uşaq gətirilib. O, koma vəziyyətində olub və beyin nahiyəsindən xəsarət qeydə alınıb. Marneuli “Geo Hospitals” klinikasının Pediatriya Şöbəsinin rəhbəri və təcili pediatriya xidmətinin həkimi Elman Sadıqov “Marneuli” radiosu ilə söhbəti zamanı bildirdi ki, uşağın valideynləri, qohumları uşağın oynadığı zaman yıxıldığını, baş nahiyəsindən xəsarət aldığını bildiriblər. Müayinələrdən sonra isə müəyyən olunub ki, azyaşlının başına güllə dəyib.

“Saat birin yarısında uşağı gətirdilər. Valideynləri və qohumları gətirmişdilər. Çox ağır vəziyyətdə – komada idi. Beyin nahiyəsində qanaxma var idi. Valideynləri dedilər ki, uşaq qardaşı ilə oynayırmış və qardaşı onu itələyib, uşaq yıxılıb. Bildirirdilər ki, çınqıla yıxılıb və başı yerə dəyib. Çınqıl xırda daşlardı və dedilər ki, yıxılan zaman xırda daşlardan biri beyin nahiyəsinə girib”, – Elman Sadıqov bildirib.

Xəstəni Marneuli “Geo Hospitals” klinikasından Tbilisiyə, İnqoroğva klinikasına aparıblar. Klinikada azyaşlının beyninə güllə dəydiyi təsdiqlənib.

“Lazımı reanimasiya müdaxiləsindən sonra süni tənəffüs aparatına qoşulmuşdu. Bundan sonra həyat üçün lazımı göstəricilər stabilləşdi. Nəzarət altında saxlayırdıq. Polisə də bildirdildi ki, uşaq travma ilə gətirilib. Heç birimiz bunu fikirləşmirdik. Çünki valideynlər və qohumlarının dəfələrlə sorğulanmasından sonra eyni cavabı almışdıq ki, uşaq yıxılaraq xəsarət alıb. Saat 2-də bizim klinikadan xəstəni İnqoroğva klinikasına apardılar. Məhz orada müəyyən olunub ki, uşağın başında daş deyil, güllə var”, – Elman Sadıqov bildirib.

İnqoroğva klinikasının Pediatriya Şöbəsinin rəhbəri Qia Bibileişvili "Marneuli" radiosu ilə söhbəti zamanı bildirdi ki, azyaşlının beyninə tüfəng gülləsi dəyib.

“Tüfəng ilə çox ciddi xəsarət dəyib. Real olaraq, bu güllə arxa beyindən girib, əhəmiyyətli yol keçib və orta beyin strukturlarına ziyan vurub. Güllə elə yerdə ilişib qalıb ki, praktiki olaraq onu çıxarmaq mümkün deyil. İndiki mərhələdə süni tənəffüs aparatındadır. Həm proqnoz baxımından, həm də hazırda idarə olunması çox çətin xəstədir”, – Bibileişvili bildirib.

İnqoroğva klinikasının Pediatriya Şöbəsinin rəhbərinin sözlərinə görə, güllənin dəyməsi nəticəsində azyaşlının beyninə ciddi ziyan dəyib və xəstənin vəziyyəti ilə bağlı proqnoz vermək çətindir.

“Marneuli” radiosu Daxili İşlər Nazirliyindən əlavə məlumat almağa çalışır.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---