Bu gün, 6 avqust tarixində “Lelo Gürcüstan naminə” partiyasının nümayəndələri Marneulidə qadınlarla görüş keçirdilər. Görüşdə Parlamentin və “Lelo” partiyasının üzvü Ana Natsvlişvili də iştirak edirdi.

O, qadınlarla qarşıdan gələn seçkilərlə bağlı danışdı. Natsvlişvilinin bildirdi ki, Parlament seçkilərində qalib gələrlərsə, Gürcüstan tez bir zamanda Avropa İttifaqının üzvü olacaq.

Görüşdə iştirak edən qadınlar onları narahat edən problemləri – yol, suvarma və içməli suyun olmaması problemlərini dilə gətirdilər.

“Oğlum və gəlinim məktəbdə işləyir, deyirlər, 41-ə səs verməsən, maaşını kəsirəm. Necə məsləhətdir, elə edək. Partiyalar bizə yardım etsinlər, biz də onlara dəstək olaq”, – iştirakçılardan biri qeyd etdi.

İştirakçılardan olan Rəna Yusifova bildirdi ki, kəndlərdə olan və insanları narahat edən problemlər danışılmalıdır.

“Biz də su, yol problemlərini deməliyik. Bunların hamısı problemdir. Bunu biz qeyd edirik ki, biz bunları yaşayırıq. Hələ ki, dövlətdən heç nə görməmişik. Bundan sonra da baxacağıq ki, hansı partiya önəmlidir, ona səs verəcəyik. Səsvermədə sərbəstik”, – görüş iştirakçısı dedi.

“Lelo” partiyasının Kvemo Kartli üzrə nümayəndəsi Aqil Mustafayev “Marneuli” radiosu ilə söhbəti zamanı bildirdi ki, birinci dəfə idi ki, azərbaycanlı qadınlar müxalifət partiyasının nümayəndəsi ilə görüş keçirdilər.

“Qadınların siyasi partiyalarda özlərini fəal görməsi çox önəmli məsələdir. Görüşün məqsədi ondan ibarət idi ki, bizim proqramımızı partiyamızın lideri olan Ana Natsvlişvilinin dilindən burada yaşayan qadınlar birbaşa eşitsinlər. Onların problemləri ilə yaxından maraqlandı. Bu kimi görüşlər yaxın gələcəkdə Kvemo Kartlini əhatə edən bütün rayonlarda yaşayan qadınlar üçün təşkil olunacaq. Hakimiyyət dəyişdikdən sonra biz verdiyimiz sözə əməl etməliyik. Biz bir, iki və ya üçillik siyasi prosesə çıxmamışıq ki, xalqı aldadaq və qaçaq. Bu bizim çıxdığımız uzunmüddətli yoldur”, – Aqil Mustafayev dedi.

Mustafayev bildirdi ki, insanları aldatmaq, onlara söz verib, əməl etməmək yalnız bu gün gördüyümüz hakimiyyətə aiddir. Onun dediyinə görə, “Lelo” partiyası çalışır ki, verdikləri vədləri yerinə yetirsin.