Marneuli rayonunun Yuxarı Qullar kəndindən olan Ramazan Əsgərov Polşa futbol klubunun heyətinə qatılıb.
Gənc futbolçu yanvar ayında “K.S.RASZYN” futbol komandasının seçmələrinə qatılıb və 6 aylıq prosesdən sonra avqust ayında komanda ilə birillik müqavilə imzalayıb.

“Futbol sahəsindəki həvəsim uşaqlıq dövrümün müxtəlif təsirlərinin bir nəticəsi olaraq inkişaf etdi. 13 yaşlarımdan etibarən idmana böyük maraq göstərirdim. Valideynlərim də

bu məsələyə isti yanaşır və mənə dəstək olurdular. Bu marağımın yaranmasında mühüm rol oynadı. Ətrafımda olan dostlarımla kənd meydançasında futbol oynamaq mənim üçün çox əyləncəli idi. Məktəbdə idman dərslərinə qatılmaq da marağımı artırdı. Özümü futbolun bir hissəsi olaraq görməyə başladım. Məşhur futbolçuları izləməyi çox sevirdim. Televiziya proqramlarında onların oyunlarını izləmək futbol sevgimi daha da artırdı. Bu maraq zamanla daha da dərinləşdi və futbolu daha yaxından tanımaq arzusu ilə doldum. Əhməd İsmayılovun məşqçilik etdiyi futbol dərslərinə qoşulmaq qərarına gəldim və burada aldığım təlimlər mənim oyun bacarıqlarımı inkişaf etdirməyə kömək etdi. Komandada təcrübəli məşqçilərin dəstəyi və komanda yoldaşlarımın ilhamverici münasibətləri mənə böyük motivasiya oldu. Məşqçilərim mənə texnikanı, taktikanı öyrədərək futbol sahəsindəki bacarıqlarımı artırdılar”.

Ramazanın sözlərinə görə, bu yolda ona ailəsi, dostları və məşqçiləri dəstək olublar. Onların verdiyi ilham vasitəsilə futbol sahəsinə olan istəyini həyata keçirməkdə irəliləyib.

“17 yaşım olanda Polşaya köçməyə qərar verdik və buraya gədikdən sonra buradakı futbol, rayon oyunlarında iştirak etməyə başladım. Özümdə bu potensial olduğuna inandım və bu ilin yanvar ayında “K.S.RASZYN” futbol klubunun seçmələrinə qatıldım, 6 aylıq prosesdən sonra avqust ayında klub ilə birillik müqavilə imzaladım. Bu müqavilənin ən qısa dövrü deməkdir. Bunu seçməkdə məqsədim bir il qalıb, Avropa oyun təcrübəmi daha da yüksəldib, gələcək mövsümdən daha prestijli klublardan təklif almaqdır. Allahın izni ilə, inşallah”, - Ramazan Əsgərov bildirdi.

Qeyd edək ki, Ramazan Əsgərov FİFA seçmələrində Argentina liqasına təklif alıb, ancaq maddi vəziyyətindən irəli gələrək davam edə bilməyib.