Qızılhacılı 74 saylı seçki məntəqəsində baş verən fiziki qarşıdurma ilə bağlı “Birlik - Milli Hərəkat” partiyasının üzvü, Marneuli Bələdiyyə Məclisinin deputatı Ramal Əhmədov 1 noyabr tarixində brifinq keçirmişdi.

Həmin brifinqdə o, Marneuli qərargahının rəhbəri Azad Kərimovun Ceyhun Çovdarov tərəfindən döyüldüyünü, onun üz nahiyəsində qırıqların olduğunu və bütün bunlara baxmayaraq hələ də DİN və Prokurorluq tərəfindən hər

hansı bir tədbirin görülmədiyini bəyan etmişdi.

“Marneuli” radiosu məsələnin təfərrüatlarını araşdırmaq məqsədilə Bələdiyyə Məclisinin “Gürcü Arzusu”ndan seçilmiş deputatı Ceyhun Çovdarovla əlaqə saxladı. O, bizimlə söhbəti zamanı bildirdi ki, Azad Kərimov öz qrupu ilə 74 saylı seçki məntəqəsinə gəlib və fiziki qarşıdurma qrup şəklində baş verib.

“Həmişə olduğu kimi, yenə yalan danışırlar. Mən həmin gün özünə zəng vurdum. Döyüb deyəndə… Əvvəlini danışsalar, orada hər şeyin necə baş verdiyi aydın olar. Ceyhun Çovdarov yolda getdiyi yerdə kimi isə gedib döyməyib. Özləri qrup şəklində yığılıb gəliblər oraya, həmin vəziyyəti yaradıblar və orada (məntəqədə) qarşıdurma yaranıb. Orada heç kim heç kimi təkbətək döyməyib. Bizim məntəqəyə gəlib qaz spreyi atıblar. Bəllidir ki, qrup şəklində məntəqəni dağıtmağa gəliblər. İçəri qaz spreyi atıblar və qarşılıqlı dava düşüb. Heç kim təkbətək heç kimi döyməyib. Yəni, onlar həmişəki kimi çıxıb yalan danışır, brifinq keçirirlər. Özlərində idi problem. Hər bir yerdə müxalifətin özü bu problemi yaradıb. Bu gün də düşüb ki, bu, belə elədi, o, elə elədi. Gedib kəndində, evində, məntəqəsində eləməmişəm. Qrup şəklində gəlib kəndimdə dava salıblar, mən də orada olmuşam. İçərini dağıtmaq üçün qaz spreyi atıblar. Qarşılıqlı qarşıdurma olub. İndi adını qoyublar kimsə kimisə döyüb. Niyə?” – Ceyhun Çovdarov dedi.

Ceyhun Çovdarov Birlik – Milli Hərəkat partiyasının nümayəndələri tərəfindən 74 saylı seçki məntəqəsinə qaz spreyinin atılması faktı ilə əlaqədar video materialın çəkilib, yayımlandığını bildirdi. Ancaq biz qeyd olunan video materialı əldə edə bilmədik.

Qeyd edək ki, Azad Kərimova hücumu əks etdirən videoda hücum edənlər arasında Qızılhacılı sakini, Bələdiyyə Məclisinin “Gürcü Arzusu”ndan seçilmiş deputatı Ceyhun Çovdarov da görünür.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---