საქართველოში ქათმის ფილეს იმპორტში ჩინეთის წილი 47%-ს აჭარბებს, - ამის შესახებ ირკვევა „ბიზნესპრესნიუსის“ კითხვის საპასუხოდ, სტატისტიკის ეროვნული სამსახურის მიერ მოწოდებული ინფორმაციიდან.

უფრო კონკრეტულად, 2025 წლის იანვარ-ივნისში საქართველოში იმპორტირებულია 19 939 ტონა ქათმის ფილე, რომლის ჯამური ღირებულებაც 31.76 მლნ დოლარს აღწევდა. აქედან, 9 472 ტონის (სულ 16.76 მლნ დოლარის ღირებულების) იმპორტი სწორედ ჩინეთიდან განხორციელდა.

ვის შემოაქვს საქართველოში ჩინური ქათმის ფილე

ამავე მონაცემების მიხედვით, მიმდინარე წლის პირველ ნახევარში ქვეყანაში ქათმის ფილეს იმპორტი შემდეგი 5 ძირითადი ქვეყნიდან განხორციელდა:

• ჩინეთი - 16.76 მლნ აშშ დოლარის 9 472 ტონა;
• ბრაზილია - 3.72 მლნ აშშ დოლარის 2 011 ტონა;
• საფრანგეთი - 2.48 მლნ აშშ დოლარის 1 904 ტონა;
• ნიდერლანდები - 2.43 მლნ აშშ დოლარის 1 848 ტონა;
• გერმანია - 1.50 მლნ აშშ დოლარის 1 151 ტონა.

„საქსტატის“ მიერ „ბიზნესპრესნიუსისთვის“ მოწოდებული ინფორმაციით, საქართველოში წელს ჩინეთიდან ქათმის ფილეს იმპორტი ძირითადად შემდეგმა კომპანიებმა განახორციელეს: „ვესტ ინვესტი“, „იზი“, „კასკო 2015“, „ფუდსერვისი“ და „ჯეო დისტრიბუშენ გრუპი“.

საჯარო რეესტრის მონაცემების მიხედვით გთავაზობთ მონაცემებს თუ ვის ეკუთვნის აღნიშნული კომპანიები:

• შპს „ვესტ ინვესტი“ საჯარო რეესტრში 2006 წელს დარეგისტრირდა. კომპანიის დირექტორი ირაკლი ჩაჩავაა, წილებს კი სრულად ფლობს ცისბედი ქართველიშვილი;
• შპს „იზი“ 2012 წელს არის რეგისტრირებული. კომპანიაში დირექტორის პოზიციას ირაკლი გერაძე იკავებს. ბიზნეს წილებს კი სრულად ფლობს იაგორი გერაძე;
• შპს „კასკო 2015“ ბაზარზე 2015 წლიდან ოპერირებს, რომლის დირექტორიც მამუკა მინდიაშვილია. კომპანიის წილების 70%-ს ლევან კაჭარავა, დარჩენილ 30%-ს კი ლევან ჭიორელი ფლობენ;
• შპს „ფუდსერვისი“ 2018 წელს დარეგისტრირდა საჯარო რეესტრში. კომპანიის წილებს სრულად განკარგავს შპს „ჰოლდინგ. ჯი“. თავის მხრივ „ჰოლდინგ. ჯის“ 100%-იან წილებს არჩილ გეგენავა ფლობს.
• შპს „ჯეო დისტრიბუშენ გრუპი“ 2012 წელს დარეგისტრირდა რეესტრში, რომლის დირექტორიც ლევან წიკლაურია. წიკლაური ფლობს კომპანიის 60%-იან წილსაც. წილების 40%-ის მფლობელი ნოდარ ჯაფარიძეა.