Son illər Gürcüstanda baş verən siyasi hadisələr fonunda oktyabrın 26-da keçirilən Parlament seçkiləri həlledici və tarixi xarakter alıb.
Bəzi qruplar üçün isə seçkilər referenduma bərabər idi.

“...Biz, Gürcüstanda yaşayan etnik azlıq nümayəndələri, bütün həlledici məqamlarda olduğu kimi, bu dəfə də tarixin doğru tərəfində dayanmalı olduğumuzu və seçkilərin tarixi əhəmiyyətini müzakirə edirdik. Müzakirələr nəticəsində qərara gəldik ki, digər hallarda olduğu kimi, bu işdə də hüquqlarımızı qorumaq üçün proseslərə öz töhfəmizi verək. Bu məqsədlə, biz, etnik azərbaycanlı vətəndaşlar olaraq “Fəallar Gələcək Naminə” siyasi hərəkatını yaratdıq.

Gürcüstanda keçirilən son seçkilər görünməmiş miqyasda saxtalaşdırıldı və buna görə də nə beynəlxalq, nə də ölkə daxilində tanınmadı. Belə

ki, hətta müxtəlif müşahidə missiyaları seçkiləri „konstitusiyanın mühüm prinsiplərinin pozulması kimi“ qiymətləndirdi. Ona görə də, mən sıravi bir fəal və siyasi hərəkatın üzvü kimi, nə seçkinin nəticələrini, nə də qondarma hökuməti tanımırdım. Seçkilərin tanınmamasından sonra fəal iştirak etdiyim etiraz mitinqləri başladı".

Noyabrın 28-də qondarma hökumət konstitusiya çərçivəsindən tamamilə kənara çıxdı və Gürcüstanın konstitusiya seçimindən imtina etdi, konkret olaraq, 2028-ci ilə qədər Avropa İttifaqı ilə danışıqlara başlamaqdan imtina edəcəyini bəyan etdi. Bu artıq nə adi bir an, nə də sadəcə seçki konteksti idi. Bu ölkənin taleyini həll edən, var olmaq və ya olmamaq mövzusu idi.

“Müvafiq olaraq, mən də bütöv Gürcüstanın dayandığı yerdə - Azadlıq Meydanında dayandım və ilk gündən davam edən etiraz aksiyalarında fəal iştirak etdim.
Biz illərdir etnik azlıqlara qarşı sistemli diskriminasiyadan və onun təzahürlərindən danışırıq. Dekabrın 3-ündə, aksiyalar dövründə, həbs olunduğum zaman mövcud sistem bizə münasibətini bir daha açıq şəkildə göstərdi. Konkret desək, həmin gün Rustaveli metrosuna doğru piyada getməyimizdən 20 dəqiqə və ya yarım saat ötürdü. Birdən xaos yarandı və yanımda bir nəfərin yıxıldığını görüb ona kömək etmək istəyəndə arxamdan tutdular. Birdən həbs olundum. Tutulduqdan sonra maşında hamı məndən soyadımı soruşurdu. Soyadımı eşidəndə dedilər: “ – Tatar, sənin burada nə işin var? Get, Əliyevə qarşı çıx, haqqını Əliyevdən tələb et. Neynirsən burada, niyə inqilab təşkil edirsən?” Mən o an mənim soyadımın niyə bu qədər vacib və ya həlledici olduğunu başa düşmədim: Axı mən də Gürcüstanın sıravi vətəndaşıyam; axı mən ki, orada bütöv Gürcüstanın dayandığı məqsəd üçün dayanmışdım; axı mən ki başqaları ilə eyni tələbləri irəli sürmüşdüm?!

Elə maşındaca 10-a yaxın xüsusi təyinatlı əməkdaşı məni qəddarca döydü. Gəl indi düşünək səbəb nə idi, məsələ sadəcə soyadımın Kərimov olması yoxsa başqa bir şey idi? Bütün hallarda heç bir müqavimət göstərməsəm də, onları hər hansısa bir şəkildə təhqir etməsəm də, məni şiddətlə döydülər və maşının açarlarını və telefonumu oğurladılar.

Eyni zamanda da təhqir etmək üçün: - “Get heyvanlarını otar, niyə torpaqda işləmirsən?” təhqirləri, söyüşləri eşidilirdi.

Məhkəmə isə, başlıca bir tamaşa idi. Mən heç anlaya bilmədim ki, tərəf hakimdir, yoxsa DİN-in nümayəndəsi. Sonda mənə 8 gün inzibati həbs cəzası verdilər.

Bu, mənim son 6 ayımın necə keçdiyinin çox qısa hekayəsi idi. Mən bunu azlıqlar olaraq gözlədiyimiz reallığı vurğulamaq üçün yazdım. Gürcüstanda onsuz da minimal olan insan haqlarının vəziyyəti daha da pisləşəcək. Nəticədə, biz bu ölkədə sadəcə tanınmayan material olacağıq. Ona görə də hər bir vətəndaşın bizim durduğumuz yerdə dayanması həyati əhəmiyyət kəsb edir!"

Material “Salam” platformasının feysbuk səhifəsindən götürülüb.

Müəllif: Elvin Kərimov

Gürcüstan hökumətinin Avropaya inteqrasiya yolundan dönməsindən sonra ölkədə genişmiqyaslı etiraz aksiyaları başlayıb. Aksiyalar hələ də davam edir. Elvin Kərimov hökumət komandasının Avropaya inteqrasiya yolundan dönməsinə qarşı çıxan fəallardan biridir və etiraz aksiyalarına fəal şəkildə qoşulur. Bu aksiyalarda bir çox vətəndaş qanunsuz olaraq saxlanılıb və zorakılığa məruz qalıb. Elvin də onlardan biridir, o, 8 gün ərzində həbsdə olub. Bu günə qədər bir çox günahsız məhbus hələ də həbsdədir.