“Gürcü Arzusu”, “Qrantlar haqqında Qanuna” elan edilmiş və birinci oxunuşdan keçmiş dəyişikliklərə əlavə olaraq,

Cinayət Məcəlləsinə də dəyişikliklər təqdim edib ki, bu dəyişikliklə “hakimiyyətin sistemli şəkildə tanınmaması” həbs cəzası ilə cəzalandırılacaq.

Bundan başqa, “hakimiyyətin tanınmaması” Cinayət Məcəlləsində cinayətin törədilməsinə əlavə olunan “ağırlaşdırıcı hallara” əlavə edilir.

Nəticədə, bu və ya digər maddəyə görə nəzərdə tutulan həbs müddətinə əlavə olaraq daha bir il artırılacaq.

Dəyişikliklər bazar ertəsi, 16 fevralda Parlament sarayında, hüquq komitəsinin iclasında dəyişikliklər paketinin ikinci oxunuşda müzakirəsi zamanı təqdim edilib və altı səs lehinə, bir səs əleyhinə olmaqla təsdiqlənib.

Qanun layihəsinin yenilənmiş versiyasını “Gürcü Arzusu”nun üzvlərindən biri, hüquqi məsələlər komitəsinin sədri Arçil Qorduladze təqdim edib.
Yeni cinayət – “qeyri-legitimlik qavrayışının formalaşdırılması”
Üç ilədək həbs cəzası ilə cəzalandırılacaq Gürcüstan vətəndaşı və ya vətəndaşlığı olmayan şəxs aşağıdakı çağırışlara görə, əgər bu çağırışlar yönəlibsə:

• Gürcüstan qanunvericiliyinin kütləvi şəkildə pozulmasına;
• Gürcüstan hakimiyyəti orqanlarına qarşı kütləvi itaətsizliyə;
• Gürcüstan hakimiyyətinə alternativ orqanların yaradılmasına;

Və əgər bu çağırışlar “sistematik” və “ictimai” şəkildə edilirsə.

Həmçinin cəzalandırılacaq “eyni şəxsin Gürcüstan hakimiyyəti nümayəndəsi kimi özünü və ya başqasını özbaşına, ictimai və sistematik şəkildə təqdim etməsi”.
Cəzalandırılacaq digər “sistemli fəaliyyət”, əgər o:
• Gürcüstanın konstitusiya quruluşunun və ya konstitusiya orqanlarının qeyri-legitimliyi qavrayışının formalaşdırılmasına yönəlirsə və
• Gürcüstanın maraqlarına ziyan vurursa
• və ya maraqlara real ziyan təhlükəsi yaradırsa.
Cəza növləri aşağıdakılardır:
• cərimə — məbləğ qeyd olunmayıb,
• 400–600 saat ictimai iş,
• 3 ilədək həbs.
Hüquqi şəxslər üçün — eyni əməl “cərimə və ya ləğvetmə və cərimə” ilə cəzalandırılacaq.

“Sistemlilik və ictimailik”
Arçil Qorduladze bildirib ki, əsas məsələ “sistemlilik, sistematiklik və ictimailikdir”.
“Ola bilsin, bir şəxsin ifadə etdiyi performans, əlbəttə ki, cinayət sayılmayacaq”, – deyə o bildirib.

Dəqiq redaktə olunmuş qanun layihəsi hələ dərc olunmayıb və mətndəki məlumatlar Qorduladzenin komitə iclasında dediyi açıqlamalara əsaslanır.
Bu dəyişikliklər Cinayət Məcəlləsinə 316-cı prim maddəsi kimi əlavə edilir.

316-cı maddə “hərbi rəhbərliyin qanunsuz ələ keçirilməsi və ya qanuni hakimiyyətə itaətsizlik”lə bağlıdır.

“Ağırlaşdırıcı hal”
Hakimiyyətin tanınmaması “ağırlaşdırıcı hallara” da əlavə edilir.

“Sərrast şəkildə, cəzanın təyin olunması zamanı ağırlaşdırıcı hal odur ki, cinayət Gürcüstanın konstitusiya quruluşunun və ya konstitusiya orqanlarının tanınmaması motivi ilə törədilib”, — deyə Qorduladze dəyişikliklərin mahiyyətini izah edib.

Bu dəyişikliklə, hakim bir maddə üzrə cəza təyin edərkən həmin cəzanın müddətini əlavə bir il artırmalıdır.

“Rusiya” və “ölkə daxilindəki qüvvələr”
“Gürcü Arzusu” hökumətinin rəhbəri İrakli Kobaxidze jurnalistlərlə söhbətində Rusiya Federasiyasının Abxaziya və Tsxinvali regionunu işğal etməsini, müxalifət partiyalarının “Gürcü Arzusunu” “qeyri-legitim hakimiyyət” adlandırması ilə müqayisə edib.

“Siz bilirsiniz ki, Rusiya və daha dörd konkret ölkə Gürcüstan hakimiyyətinin yurisdiksiyasını Gürcüstan ərazisinin 20%-də tanımır. Ölkə daxilində isə elə qüvvələr var ki, onun qalan 80%-ində də Gürcüstanın yurisdiksiyasını tanımırlar”, – deyə o bildirib.

“Bizim üçün hər ikisi eyni problemdir”, – deyə Kobaxidze əlavə edib.

“Ekstremizm”
“Cəmiyyətə məlum olduğu kimi, plenar iclasda birinci oxunuş zamanı ekstremizm məsələsi də qaldırıldı”, — deyə Qorduladze bu gün bildirib.

Bu dəyişiklikləri 3 fevralda plenar iclasda “Qrantlar haqqında Qanuna” dəyişikliklərin birinci oxunuşda müzakirəsi zamanı deputatlardan biri — Levan Maçavariani təklif etmişdi. Bu təşəbbüsü dərhal hüquq komitəsinin sədri Arçil Qorduladze dəstəkləmişdi.

Maçavariani həmin vaxt Almaniyanın “bir siyasi hərəkatı qadağan etməsi” nümunəsini göstərmişdi, lakin ad çəkməmişdi.

Bu gün Arçil Qorduladze də eyni şeyi təkrarlayaraq vəziyyəti qısa şəkildə təsvir etdi və bunun radikal sağçı-ekstremist “Almaniya Krallığı” təşkilatını nəzərdə tutduğunu təsdiqlədi. Bu qurum “Reyxsbürger” hərəkatının bir hissəsi idi — onların üzvləri özlərini “Alman Reyxinin vətəndaşları” hesab edirdilər.

Bu nümunə Gürcüstandakı müxalifət hərəkatından əhəmiyyətli dərəcədə fərqlənir — çünki müxalifətin “Gürcü Arzusu” hökumətini tanımaması əsasən 2024-cü il Parlament seçkilərinin nəticələrini qəbul etməməsi ilə bağlıdır.

“Almaniya nümunəsi”
Almaniyada 2025-ci ilin mayında “Almaniya Krallığı” adlı siyasi hərəkat qadağan edilib — bu, sağçı-extremist “Reyxsbürger” hərəkatının ən böyük strukturlarından biri idi.

Lakin qadağanın əsası hər hansı hökumətin legitimliyinin “tanınmaması” kimi siyasi mövqe olmayıb.

Təşkilat Almaniya Federativ Respublikasının dövlət olaraq legitimliyini tanımayırdı və alternativ strukturlar yaratmışdı.

2025-ci il 13 may səhəri Almaniyanın hüquq-mühafizə orqanları ölkənin müxtəlif regionlarında təşkilatın ofislərini və aparıcı üzvlərinin evlərini axtarıblar. Prokurorluq təşkilatın dörd rəhbərini, o cümlədən özünü “Almaniya Kralı” adlandıran qurucusu Peter Fitseki həbs edib.

“Almaniya Krallığı” 2012-ci ildə peşəsi aşpaz olan Peter Fitsek tərəfindən yaradılıb. “Reyxsbürger”in bu qrupunun məlumatına görə, təşkilatın təxminən 6000 üzvü var.

• “Reyxsbürger” hərəkatı 1980-ci illərdə formalaşıb.
• Üzvləri II Dünya Müharibəsindən sonra yaranmış nizamı və Almaniya Federativ Respublikasının legitimliyini tanımır;
• Onlar özlərini “Alman Reyxinin” vətəndaşları hesab edirlər və mövcud olmayan imperiyanın alternativ şəxsiyyət vəsiqələri və sürücülük vəsiqələrinə malikdirlər;
• Almaniya xüsusi xidmət orqanlarının məlumatına görə, ölkədə 20 minədək “Reyxsbürger” var. Onlardan təxminən 2300-ü zorakılığa meyllidir;
• Bu qrupun əsas ideologiyası demokratiyanın inkarı, monarxist, ksenofob və antisemit baxışlardır.
Müxalifət hərəkatı “Sosial-Demokratiya Uğrunda Hərəkat”ın liderlərindən biri, konstitusiya hüququ üzrə ekspert Vaxuşti Menabdze yazırdı ki, “Gürcü Arzusu” “manipulyasiya edir və faktları təhrif etməklə Almaniya nümunəsini Gürcüstan kontekstinə uyğunlaşdırmağa çalışır”.
“Gürcüstan halında hər şey tam əksinədir və Almaniya nümunəsinin bizə heç bir aidiyyəti yoxdur. Orada qadağan olunan təşkilatlar demokratiyaya qarşı çıxırdı, burada isə müqavimət demokratiya uğrundadır”, – deyə o qeyd edib.

Gürcüstanda situasiya
Gürcüstanda “Gürcü Arzusu” hakimiyyətinin legitimliyi 2024-cü il parlament seçkilərindən sonra sual altına düşüb.
• Dörd iri müxalifət bloku (seçki 4, 5, 9 və 25 nömrələri ilə) seçkiləri saxtalaşdırılmış hesab edib; rəsmi nəticələrə görə isə “Gürcü Arzusu” parlamentdə 89 mandatla çoxluğu qoruyub;
• Etiraz aksiyaları başlayıb və bu aksiyalar 2024-cü il 28 noyabr tarixində hökumət başçısı İrakli Kobaxidzenin “2028-ci ilə qədər” Avropa İttifaqı ilə danışıqların gündəmə gətirilməyəcəyini açıqlamasından sonra daha da güclənib; aksiyalar bir neçə gün ardıcıl dağıdılıb;
• Beşinci prezident Salome Zurabişvili — seçki nəticələrini tanımayan müxalifət liderlərindən biri — altı illik müddəti başa çatdıqdan sonra, 2024-cü ilin sonunda Prezident Sarayını tərk edib. O, əvvəlcə “legitimliyi özü ilə apardığını” demişdi, lakin 2025-ci ildə açıqladı: “Mən demirəm ki, legitim prezidentəm”;
• Avropa Parlamenti 2024-cü ildən başlayaraq bir neçə qətnamə ilə Gürcüstan Parlamentini “qeyri-legitim parlament” adlandırıb və təkrar seçkilər tələb edib;
• Öz növbəsində, Bidzina İvanişvilinin “Gürcü Arzusu” 2022-ci ildən bəri iri etiraz hərəkatlarını “dövlət çevrilişi cəhdi” adlandırır və iddia edir ki, bu proses “qlobal müharibə partiyası” tərəfindən idarə olunur və onun Avropa İttifaqı da daxil olmaqla dünya liderləri üzərində təsiri var.

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

 

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.