"Arzu" hakimiyyəti tanımamağa görə həbs cəzası tətbiq edir
Parlamentin Hüquq Komitəsi ikinci oxunuşda dəyişiklikləri təsdiqləyib. Buna əsasən, "hakimiyyəti sistemli şəkildə tanımamaq" cinayət hesab olunacaq və 3 ilə qədər həbslə cəzalandırılacaq. Bundan əlavə, bu əməl digər cinayətlər törədilərkən ağırlaşdırıcı hal kimi qiymətləndiriləcək və cəzanı daha bir il artıracaq. Ombudsman hesab edir ki, bu dəyişikliklər Gürcüstan Konstitusiyasına və beynəlxalq ifadə azadlığı standartlarına zidd ola bilər.

Baço Axalaya həbsdə qalır - Səs yazısının saxtalığı mübahisəsi
Tbilisi Şəhər Məhkəməsi keçmiş müdafiə naziri Baço Axalayanı həbsdə saxlayıb. O, 2025-ci il oktyabr aksiyasını təşkil etməkdə ittiham olunur. Müdafiə tərəfinin sözlərinə görə, ekspertiza Burçuladze və Axalaya arasındakı telefon danışığının saxta olduğunu təsdiqləyib. Prokurorluq isə bildirir ki, işdə onlarla müxtəlif ekspertiza rəyi var, lakin proses qapalı olduğu üçün təfərrüatlar açıqlanmır.

Tbilisidə Navalnının xatirə aksiyası qadağan edilib
Daxili İşlər Nazirliyi rusiyalı fəallara Tbilisidə, Puşkin büstünün yanında Aleksey Navalnının xatirəsinə aksiya keçirməyə icazə verməyib. Təşkilatçıların sözlərinə görə, risklərdən qaçmaq üçün tədbir qapalı məkana keçirilib. Bu gün Navalnının ölümündən iki il ötür. Xatırladaq ki, Qərb ölkələrinin rəyinə görə, müxalifətçi həbsxanada epibatidinlə zəhərlənib.

Qış Olimpiadasında tarixi gümüş medal
İtaliyada Gürcüstan üçün tarixi uğur - Anastasiya Metelkina və Luka Berulava Qış Olimpiya Oyunlarında fiqurlu konkisürmə yarışında gümüş medal qazanıblar. Bu, Qış Olimpiadaları tarixində Gürcüstanın ilk medalıdır. Gürcü cütlüyü 221.75 xal toplayaraq yalnız yapon rəqiblərindən geri qalıb.

"Salam" təşkilatı təhsil islahatını tənqid edir
"Salam" icma təşkilatı bildirir ki, hökumətin yeni islahatı etnik azlıqlar üçün təhsilin əlçatanlığını məhdudlaşdırır. Təşkilatın fikrincə, qeyri-gürcü dilli tələbələrə gürcü dilini öyrənməyə kömək edən "1+4" proqramının taleyi qeyri-müəyyəndir. "Salam" hesab edir ki, inklüzivliyin azalması sosial bərabərsizliyi dərinləşdirəcək.