Azərbaycandan İrana humanitar yardım göndərilir. AZƏRTAC-ın xəbərinə görə, yardım Fövqəladə Hallar Nazirliyinin avtomobilləri vasitəsilə yola salınır.

Humanitar yardımın tərkibinə 30 tona yaxın qida məhsullarının daxil olduğu açıqlanıb. Yardıma 10 ton un, 6 ton düyü, 2.4 ton şəkər, 4 tondan artıq içməli su, 600 kiloqrama yaxın çay, həmçinin 2 tona yaxın dərman və tibbi ləvazimatlar daxildir.


9 mart
Azərbaycanla İran arasında yüklərin daşınması bərpa olunub
Azərbaycan ilə İran İslam Respublikası arasında dövlət sərhədindən bütün növ nəqliyyat vasitələri üçün yüklərin daşınması məqsədilə giriş-çıxış martın 9-u saat 10:00-dan etibarən bərpa olunur.

Bu barədə Azərbaycan Nazirlər Kabinetinin mətbuat xidmətindən bildirilib.

Martın 5-də Azərbaycan İranla sərhəddə yük maşınlarının hərəkətini dayandırmışdı. Buna səbəb kimi həmin gün Naxçıvana dron hücumları göstərilirdi. Prezident İlham Əliyev baş verənlərə görə İranı günahlandırmışdı.

Bakıdan Naxçıvana birbaşa uçuşlar bərpa edilib
"Azərbaycan Hava Yolları" (AZAL) martın 9-dan etibarən Bakıdan Naxçıvan istiqamətində birbaşa uçuşları bərpa edib. Bu barədə AZAL-ın mətbuat xidmətindən məlumat verilib.

Martın 5-də Naxçıvan Muxtar Respublikasına (MR) dron hücumlarından sonra Bakı-Naxçıvan-Bakı marşrutu üzrə planlaşdırılan bütün birbaşa reyslər ləğv olunmuşdu.

Əvəzində Bakıdan Naxçıvana gedəcək ölkə vətəndaşları Türkiyənin qonşu İğdır şəhərinə uçur, oradan isə avtobuslarla Naxçıvana qayıdırdılar.

Naxçıvan MR ilə Azərbaycanın digər ərazilərinin quru sərhədi yoxdur.

8 mart
Pezeşkian Əliyevə zəng edib
Martın 8-də İran İslam Respublikasının prezidenti Məsud Pezeşkian Azərbaycan prezidenti İlham Əliyevə zəng edib.

AZƏRTAC-ın xəbərinə görə, Pezeşkian Naxçıvanın havadan atəşə tutulması ilə bağlı insidentin İranla əlaqəsi olmadığını deyərək hadisənin araşdırılacağını bildirib.

Xəbərə görə, Əliyev də hadisənin araşdırılmasının vacibliyini vurğulayıb.

Telefon söhbəti əsnasında dövlət başçıları müştərək iqtisadi layihələrin inkişafı perspektivləri ilə bağlı fikir mübadiləsi aparıblar.

Azərbaycanla İran, əsasən, nəqliyyat, energetika və iqtisadi sahələrdə birgə layihələr həyata keçirir. Əsas layihələrə Araz çayı üzərində Xudafərin, Qız Qalası hidroqovşağının tikintisi, "Şimal-Cənub" nəqliyyat dəhlizi daxildir.

Makron Əliyevə zəng vurub
Fransa prezidenti Emmanuel Makron martın 8-də Azərbaycan prezidenti İlham Əliyevə zəng edərək Naxçıvana hava hücumu ilə əlaqədar ölkəsinin Azərbaycanla həmrəyliyini və dəstəyini ifadə edib.

Bu barədə Azərbaycan Prezidentinin Mətbuat Xidməti məlumat verib.

Məlumata görə, telefon söhbəti əsnasında Cənubi Qafqaz regionunda sülhün möhkəmləndirilməsi və Azərbaycan-Fransa əməkdaşlığın perspektivləri ilə bağlı məsələlər müzakirə olunub.

ABŞ-dan dəstək
"Amerika Birləşmiş Ştatları İran rejiminin 5 mart tarixində Naxçıvan Beynəlxalq Hava Limanını və orta məktəbi hədəf alan səbəbsiz dron hücumunu qətiyyətlə pisləyir". ABŞ-nin Azərbaycandakı səfirliyinin martın 8-də yayılan açıqlamasında belə bildirilir.

Vurğulanır ki, "bu zərbələr Azərbaycanın suverenliyinin kobud şəkildə pozulması olmaqla yanaşı, İranın təcavüzkar davranışının əsassız şəkildə eskalasiyasıdır".

"Amerika Birləşmiş Ştatları bu təhdidlər qarşısında Azərbaycanla tam həmrəylik nümayiş etdirir. Bölgədəki tərəfdaşlarımızın ərazisinə qarşı hücumlar qəbuledilməzdir və belə hallara ABŞ-ın həmin tərəfdaşlara qətiyyətli dəstəyi ilə cavab veriləcək", - açıqlamada deyilir.


6 mart
Azərbaycanın İrandakı diplomatlarının evakuasiyası barədə göstəriş verilib
"Əlavə təhlükəsizlik tədbirləri çərçivəsində Tehrandakı səfirliyimizin və Təbrizdəki baş konsulluğumuzun evakuasiyası barədə göstəriş verilib".

AZƏRTAC-ın xəbərinə görə, bunu martın 6-da Azərbaycanın xarici işlər naziri Ceyhun Bayramov bildirib.

5 mart
Bayramovla Mirzoyan Naxçıvana dron hücumundan danışıblar
Martın 5-də Azərbaycan xarici işlər naziri Ceyhun Bayramov ilə Ermənistan xarici işlər naziri Ararat Mirzoyan arasında telefon danışığı baş tutub.

Azərbaycan Xarici İşlər Nazirliyinin (XİN) məlumatına görə, Bayramov həmkarını Naxçıvan Muxtar Respublikasına mülki infrastruktura ziyan vurulması və mülki şəxslərin xəsarət alması ilə nəticələnən dron hücumları barədə məlumatlandırıb.

"Tərəflər narahatlıqlarını ifadə edərək gərginliyin daha da artmasına səbəb ola biləcək addımlardan çəkinməyin əhəmiyyətini vurğulayıblar", - məlumatda bildirilir.

Nazirlər Ermənistan və Azərbaycan arasında dayanıqlı sülhün təmin olunmasının vacibliyini qeyd edib, qarşılıqlı maraq doğuran məsələlər ətrafında fikir mübadiləsi aparıblar.

Ötən əsrin 80-ci illərindən Qarabağ münaqişəsi ilə bağlı Azərbaycan və Ermənistan arasında gərginlik olub. Gərginlik zaman-zaman hərbi toqquşmalarla nəticələnib, Azərbaycan 20 faiz ərazilərinə nəzarəti itirib. Lakin 2023-cü ildə Bakı tam olaraq bütün ərazilərində suverenliyini bərpa edib. Son illər tərəflər həm Avropa İttifaqının, həm də Rusiyanın vasitəçiliyi ilə sülh danışıqları aparsalar da, bu nəticə verməyib. Nəhayət, ötən il avqustun 8-də Vaşinqtonda ABŞ-nin vasitəçiliyi ilə sülh sazişi paraflanıb. Sənəddə tərəflər bir-birinin ərazisini tanıdığını bəyan edib, qarşılıqlı iddialardan əl çəkməyi zəruri sayırlar.

Əraqçi və Saar Bayramova zəng vurub
Martın 5-də həm İran İslam Respublikasının, həm də İsrailin xarici işlər nazirləri Azərbaycan XİN rəhbəri Ceyhun Bayramova zəng vurublar.

Bu barədə Azərbaycan Xarici işlər Nazirliyi (XİN) məlumat yayıb.

Məlumata görə, telefon danışığı zamanı Bayramov İran tərəfindən Naxçıvan Muxtar Respublikası ərazisinə dron hücumlarını pisləyib, bu hücumlarla bağlı qəti etirazını bildirib.

"İran naziri Naxçıvan ərazisinə dron hücumları ilə bağlı narahatlığını ifadə edib. İran tərəfinin və hərbçilərin bu hadisə ilə bağlı araşdırma başladığını bildirib. İran naziri yaralanan mülki şəxslərə şəfa diləyib", - məlumatda vurğulanıb.

"İran tərəfindən hücumla bağlı üzr istənilməsini, araşdırmaların nəticələrinə dair qısa müddət ərzində izahat verilməsini, bu kimi halların gələcəkdə təkrarlanmaması üçün zəruri tədbirlər görülməsini gözlədiyimiz diqqətə çatdırılıb", - Azərbaycan XİN-in məlumatında əlavə edilib.

İsrailin XİN rəhbəri Gideon Saarla telefon danışığında da regionda artan təhlükəsizlik riskləri, xüsusilə hərbi gərginlik və bunun regional sabitliyə təsirləri ətrafında fikir mübadiləsi aparılıb.

XİN-in açıqlamasına görə, İsrail tərəfi Naxçıvana dron hücumunu pisləyib, Azərbaycanla həmrəy olduğunu bildirib.

Azərbaycan və Türkiyə prezidentləri danışıb
Martın 5-də Türkiyə prezidenti Rəcəb Tayyib Ərdoğan azərbaycanlı həmkarı İlham Əliyevə zəng edib.

President.az saytının məlumatına görə, Türkiyə prezidenti İran İslam Respublikası tərəfindən Naxçıvana dron hücumunu qınadığını deyib, Azərbaycan xalqına dəstəyini ifadə edib.


Naxçıvana təyyarə reysləri İğdır aeroportuna yönələcək
Martın 5 -də Türkiyənin xarici işlər naziri Hakan Fidan azərbaycanlı həmkarı Ceyhun Bayramova zəng vurub.

Azərbaycan Xarici işlər Nazirliyinin (XİN) məlumatına görə, telefon danışığı zamanı İran tərəfindən dünən, martın 4-də Türkiyə istiqamətində raket hücumu, bu gün isə Azərbaycana edilən dron hücumu ilə bağlı qəti etiraz bildirilib: "Bu kimi hücumların qəbuledilməz olduğu diqqətə çatdırılıb".

Məlumatda əlavə edildiyinə görə, Naxçıvana təyyarə reyslərinin təhlükəsizliyi məqsədilə uçuşların müvəqqəti olaraq İğdır hava limanına yönləndirilməsi qərara alınıb: "Telefon danışığı zamanı nazirlər iki ölkə arasında strateji müttəfiqlikdən irəli gələn əlaqələndirmə işlərinin davam etdirilməsinin əhəmiyyətini vurğulayıblar".

Naxçıvan Muxtar Respublikası (MR) 1924-cü ildə yaradılıb. Onun Azərbaycanın başqa əraziləri ilə quru sərhədi yoxdur. Türkiyə, Ermənistan və İran İslam Respublikası ilə qonşudur.

Tehran Azərbaycanı hədəfə almadığını bildirir
Tehran qonşu ölkələri hədəfə almır. Bunu İranın xarici işlər nazirinin müavini Kazım Qəribabadi "AnewZ" televiziyasına müsahibəsində deyib. O, Naxçıvan aeroportunun dronlarla vurulması xəbərini belə şərh edib. "Yalnız düşmənlərimizin hərbi bazaları olan ölkələr hədəfə alınacaq", - Qəribabadi bildirib.

Nazir müavini bu insidentlə bağlı xəbərləri araşdıracağını sözlərinə əlavə edib.

Bundan öncə İranın Silahlı Qüvvələri Azərbaycanın dronlarla hədəfə alınması xəbərlərini təkzib edib.


AMN İranın dörd dron yönəltdiyini deyir
Azərbaycan Müdafiə Nazirliyi (AMN) İran tərəfinin təkzibini məqbul saymır.

"Texniki vasitələrlə təsbit edilmişdir ki, İran Silahlı Qüvvələri tərəfindən dörd pilotsuz uçuş aparatı Azərbaycanın Naxçıvan bölgəsinə doğru hücum aktları törətmək üçün yönləndirilib", - nazirlik vurğulayıb.

"Onlardan biri Azərbaycan ordusu tərəfindən sıradan çıxarılıb, digərləri isə mülki infrastrukturu, o cümlədən dərs saatlarında orta məktəb binasını hədəfə alıb. Orta məktəb binasını hədəfə alan pilotsuz uçuş aparatı xoşbəxtlikdən hədəfə yetişməyib, məktəbin yaxınlığında yerə çırpılaraq partlayıb", - AMN əlavə edib.

Naxçıvana dronla zərbələr endirilib
Bu gün, martın 5-də İranın Azərbaycanın Naxçıvan Muxtar Respublikasının mərkəzi Naxçıvan şəhər aeroportunu dronla vurduğu bildirilir. Bu barədə Muxtar Respublika sakinləri bildirib.

Daha bir neçə dronun isə digər yerlərə düşdüyü vurğulanır.

"Reuters" Azərbaycan hökumətinə yaxın mənbəyə istinadla yazır ki, İrandan Naxçıvan aeroportu yaxınlığına raket və dronlar düşüb.

Naxçıvan Beynəlxalq Aeroportu İranla sərhəddən 10 km məsafədə yerləşir.

Naxçıvan sakinləri AzadlıqRadiosuna deyib ki, muxtar respublikada ali və orta məktəblərdən valideynlərə təcili gəlib uşaqlarını götürmək tapşırılıb. "Polis insanları sıx, bir yerə toplaşmağa qoymur. Onları evlərinə getməyə, təhlükəsizlik qaydalarına əməl etməyə çağırır", - sakinlərdən biri vurğulayıb.

Naxçıvan xəstəxanası: Dörd nəfər müraciət edib
Naxçıvan Muxtar Respublikası (NMR) Ali Məclisi və Nazirlər Kabinetinin rəsmi "Şərq Qapısı" saytı xəbər verir ki, dron hücumu ilə bağlı təcili yardım şöbəsinə dörd nəfər müraciət edib.

"İki nəfər barotravma alıb, iki nəfərə isə kürək nahiyəsinin küt travması diaqnozu qoyulub. Xəstələrə ilkin yardım olunub, vəziyyətləri stabildir və müvafiq şöbələri yerləşdiriliblər", - Naxçıvan Xəstəxanasının Təcili yardım şöbəsinin müdiri Sahib Abuzərov bildirib.


Naxçıvanda dron hücumu ilə bağlı cinayət işi başlanıb
Naxçıvanda mülki infrastruktura dron hücumu ilə bağlı cinayət işi başlanıb. Baş Prokurorluq məlumat yayıb.

Bildirilib ki, martın 5-də İran ərazisindən uzaqdan idarəolunan partlayan döyüş başlığı ilə təchiz edilmiş iki ədəd pilotsuz uçuş aparatları (PUA) vasitəsilə Naxçıvan Muxtar Respublikasının mülki infrastruktur obyektlərinə hücum həyata keçirilib: "Naxçıvan Beynəlxalq Hava Limanının inzibati binasına və işinə əhəmiyyətli ziyan vurulub... Naxçıvan-Bakı istiqaməti üzrə 264 nömrəli reysi həyata keçirməli olan təyyarə havada olarkən təhlükəsizlik məqsədilə Bakı istiqamətində geri qayıtmağa məcbur olub".

"Cinayət Məcəlləsinin 214.2.1, 214.2.3, 214.2.4 (terrorçuluq) və 270-1.3-cü (aviasiya təhlükəsizliyinə təhdid yaradan əməllər) maddələri ilə cinayət işi başlanaraq ibtidai istintaq aparılır", - Baş Prokurorluq əlavə edib

Hadisə nəticəsində dörd mülki şəxsin xəsarət aldığı bildirilir. Onlardan üçünün hava limanının əməkdaşı, birinin isə sərnişin olduğu vurğulanır.

İran səfiri Azərbaycan XİN-ə çağrıldı
Naxçıvan Muxtar Respublikasının (MR) dron hücumuna məruz qalmasını Azərbaycan Xarici İşlər Nazirliyi (XİN) də təsdiqləyib.

Nazirliyin açıqlamasına görə, martın 5-də Naxçıvana İran İslam Respublikasının ərazisindən dron hücumları həyata keçirilib: "Bir dron Naxçıvan Muxtar Respublikasının Hava Limanının terminal binasına, digəri isə Şəkərabad kəndində məktəb binasının yaxınlığına düşüb".

XİN əlavə edib ki, iki nəfər mülki şəxsin xəsarət alması ilə nəticələnən bu hücum beynəlxalq hüququn norma və prinsiplərinə ziddir, regionda gərginliyin artmasına xidmət edir: "İran İslam Respublikası tərəfindən qısa müddət ərzində məsələyə aydınlıq gətirilməsini və bu kimi halların gələcəkdə təkrarlanmaması üçün zəruri təxirəsalınmaz tədbirlər görməyi tələb edirik".

XİN bəyan edir ki, Azərbaycan tərəfi müvafiq cavab tədbirləri görmək hüququnu özündə saxlayır: "İran İslam Respublikasının Azərbaycan Respublikasındakı fövqəladə və səlahiyyətli səfiri Müctəba Dərmiçilu Xarici İşlər Nazirliyinə çağırılıb. İran tərəfinə kəskin etiraz bildirilərək müvafiq etiraz notası təqdim ediləcək".


Azərbaycan Müdafiə Nazirliyi: 'Zəruri cavab tədbirləri...'
Azərbaycan Müdafiə Nazirliyi (AMN) bildirib ki, pilotsuz uçuş aparatlarının texniki parametrləri və bu hücumların təfərrüatları araşdırılır: "Azərbaycan Müdafiə Nazirliyi hər hansı hərbi zərurət olmadığı halda, İran İslam Respublikası silahlı qüvvələri tərəfindən ölkəmizin ərazisində mülki infrastruktura qarşı törədilən hücumları qəti şəkildə pisləyir".

AMN qeyd edib ki, baş vermiş hadisəyə görə məsuliyyət tam şəkildə İranın üzərinə düşür.

"Azərbaycan Müdafiə Nazirliyi ölkəmizin ərazi bütövlüyünün, suverenliyinin müdafiəsi, mülki şəxslərin və mülki infrastrukturun təhlükəsizliyinin təmin olunması üçün zəruri cavab tədbirlərini hazırlayır, bu hücum aktları cavabsız qalmayacaq", - AMN sonda əlavə edib.


Mirqədirov: "Azərbaycan və Türkiyə hadisələrin təhlükəli gedişinə hazırlaşmalıdır"
"Naxçıvan Muxtar Respublikasının beynəlxalq aeroportuna dron hücumu təsadüf də ola bilər, vəziyyətin kəskin şəkildə ağırlaşdırırılması ilə bağlı da". Bunu AzadlıqRadiosuna siyasi icmalçı Rauf Mirqədirov deyib. Onun fikrincə, məntiqlə İranın Türkiyə və Azərbaycana hücum etməsi ilə bağlı hər hansı bir əsas yoxdur, onlar bitərəfliyi qoruyub saxlamağa çalışırlar.

R.Mirqədirovun vurğulamasına görə, İranda rejimin devrilməsinə İraqdakı kürd əsilli yaraqlıların qoşulmasına dair məlumatlar eşidilir və bu da vəziyyəti gərginləşdirir: "Bu gün Azərbaycanda çoxları İran rejimi üçün yas tutur. Yas tutmaq lazım deyil. Mövcud təhdidləri nəzərə almaq lazımdır. Rejimin gec-tez dağılacağının qaçılmaz olduğunu nəzərə alaraq, çoxdan hadisələrin inkişafına hazır olmaq lazım idi. Bu, İranın parçalanmasına və ya konfederasiyaya çevrilməsinə start verə biləcək hadisədir".

R.Mirqədirova görə, baş verənlər Azərbaycan və Türkiyədən birlikdə hadisələrin təhlükəli gedişinə hazırlaşmaq tələb edir.

Mənbə: Azadlıq Radiosu

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.