Rusiya Xarici İşlər Nazirliyi (XİN) Ukraynanın mayın 9-da Moskvaya zərbə endirəcəyi təqdirdə Rusiyanın Kiyevə "qaçılmaz zərbəsi ilə əlaqədar" bütün dövlətləri öz səfirliklərini Ukrayna paytaxtından təxliyə etməyə çağırıb.

XİN-in rəsmi nümayəndəsi Mariya Zaxarova bildirib ki, nazirlik bütün ölkələrin hakimiyyət orqanlarını və beynəlxalq təşkilatların rəhbərlərini bu bəyanata "maksimum" məsuliyyətlə yanaşmağa səsləyir.

Mayın 4-də Rusiya Müdafiə Nazirliyi mayın 8-9-u üçün birtərəfli atəşkəs elan edib. Ukrayna prezidenti Volodimir Zelenski buna cavab olaraq mayın 6-sı gecəyarıdan "sükut rejimi" tətbiq edib. Lakin Rusiya bu rejimi pozub.

Zelenski: Rusiya atəşkəs rejimini pozub
Ukrayna prezidenti Volodimir Zelenski bildirib ki, Rusiya ordusu mayın 6-sı gecəyarıdan sonra da aktiv döyüş əməliyyatlarını dayandırmayıb və Kiyevin irəli sürdüyü atəşkəs rejimini faktiki olaraq rədd edib.

"Hərbçilərimizin və kəşfiyyatın axşam hesabatları əsasında növbəti addımlarla bağlı qərar verəcəyik", – Zelenski mayın 6-da hərbi komandanlıqla keçirdiyi müşavirədən sonra vurğulayıb.

O, Ukraynanın "güzgü prinsipi" ilə hərəkət edəcəyinə dair vədini xatırladıb.

Rusiya mayın 8-9-u üçün birtərəfli atəşkəs elan edib. Zelenski və digər Ukrayna rəsmiləri isə bildirmişdilər ki, onlar atəşkəsə qarşı deyillər, lakin yalnız Moskvadakı 9 May paradı naminə atəşkəslə razılaşmaq istəmirlər.

Rusiya hakimiyyəti isə Ukraynanın mayın 6-dan qüvvəyə minməsini istədiyi atəşkəs təklifinə hələlik rəsmi reaksiya verməyib.


Ukraynada bir gündə Rusiyanın zərbələrindən azı 26 nəfər həlak olub
Mayın 5-də Rusiya qüvvələri Ukraynanın azı üç şəhərinə aviabombalar və dronlarla zərbələr endirib. Nəticədə azı 26 nəfər həlak olub, onlarla insan yaralanıb. Bu, son aylarda Ukraynaya qarşı ən qanlı hücumlardan biri hesab olunur.

Ukrayna isə sərhəddən təxminən 1200 kilometr uzaqlıqda yerləşən Rusiya vilayətinə yeni uzaqmənzilli qanadlı raket və çoxsaylı dron göndərib. Ukrayna prezidenti Volodimir Zelenski "Flaminqo" raketlərinin Rusiyada bir silah zavodunu hədəfə aldığını bildirib.

Bu qarşılıqlı hücumlar Rusiya və Ukraynada İkinci Dünya müharibəsində Nasist Almaniyasının məğlub edilməsinin ildönümü tədbirlərindən bir neçə gün əvvəl baş verib.

8-9 mayda tədbirlər planlaşdırılır
Ukraynada 2023-cü ildən etibarən mayın 8-də "Nasizm üzərində Qələbə və Anım Günü" tədbirləri keçirilir. Bu tədbirlərdə müharibə veteranları diqqət mərkəzində olur.

Rusiya isə 9 May Qələbə Gününü Sovet hərbi tarixinin təntənəli nümayişinə çevirib. Artıq beşinci ildir davam edən Ukraynaya qarşı müharibə də həmin gün təriflənir.

Bu il Kremlə yaxın Qırmızı meydanda keçiriləcək illik hərbi parad kiçik miqyasda, hərbi texnikasız təşkil olunacaq. Kremlin rəsmiləri bunu Ukrayna dronlarının yaratdığı təhlükə ilə izah ediblər. Bu həftə Ukraynanın atdığı güman edilən dron Kremlin bir neçə kilometrliyindəki çoxmərtəbəli binaya dəyib.

Rusiya prezidenti Vladimir Putin 9 May tədbirləri ilə əlaqədar atəşkəs elan edib. Zelenski isə mayın 5-dən etibarən atəşkəs elan olunduğunu açıqlayıb.


Zelenski: "Flaminqo" raketləri silah zavodunu vurdu
Son illər Ukrayna dron və raket arsenalını genişləndirərək Rusiyanın dərinliklərinə zərbələr endirir. Zelenski bildirib ki, Çeboksarıya hücumda Ukraynanın sürətlə hazırladığı "Flaminqo" raketlərindən istifadə olunub. Hədəf Rusiya ordusunu naviqasiya komponentləri ilə təmin edən zavod olub. Region qubernatoru hücum nəticəsində azı iki nəfərin öldüyünü, 30-dan çox insanın yaralandığını bildirib.

Xilasediciləri də vurdular
Rusiya qüvvələri Ukraynanın azı üç bölgəsini aviabombalarla hədəfə alıb. Bu bombalar təyyarələrdən atılır və böyük həcmdə partlayıcı daşıyır.

Zaporojyedə bombardman nəticəsində azı 12 nəfər ölüb, 10-dan çox insan yaralanıb. Rusiyanın dronları isə şimaldakı Çerniqov şəhərində yaşayış binalarına zərbə endirərək azı 17 nəfəri yaralayıb.


Dövlətə məxsus "Naftoqaz" şirkəti Poltava yaxınlığındakı qaz obyektinə Rusiyanın zərbəsi nəticəsində üç əməkdaşının öldüyünü açıqlayıb. "İkiqat zərbə" taktikası ilə həyata keçirilən hücumda daha iki xilasedici də həlak olub. Bu taktika birinci hücumdan sonra hadisə yerinə gələn xilasedicilərin ikinci zərbə ilə vurulmasını nəzərdə tutur.

Donbas vilayətində cəbhə xəttinə yaxın Kramatorsk şəhərinə Rusiyanın hava zərbəsi nəticəsində azı beş nəfər ölüb, doqquz nəfər yaralanıb. Rəsmilərin sözlərinə görə, mərkəzi Dnepr şəhəri də Rusiya dron və raketlərinin hücumuna məruz qalıb, nəticədə azı dörd nəfər həlak olub.

Rusiya ötən gecə Ukraynaya üç raket və 108 dron buraxıb
Rusiya ordusu mayın 6-na keçən gecə Ukraynaya iki "İsgəndər-M" ballistik raketi, bir X-31 idarəolunan raketi və 108 zərbə dronu ilə hücum edib. Ukrayna Silahlı Qüvvələrinin yaydığı məlumata görə, dronlardan 89-u zərərsizləşdirilib.

Hücumlar gecəyarıdan, yəni Ukrayna prezidenti Volodimir Zelenskinin elan etdiyi atəşkəs qüvvəyə mindikdən sonra baş verib. Xarkov, Sumı, Donetsk, Zaporojye və Dnepropetrovsk vilayətlərinə aviabombalar atılıb, dronlarla hücumlar həyata keçirilib.

Döyüş meydanında isə, demək olar ki, çıxılmaz vəziyyət yaranıb. Rusiya bölmələri ağır itkilər bahasına ləng irəliləyiş əldə edir. Bəzi yerlərdə isə onların mövqelərini itirdiyi bildirilir.

Mənbə: Azadlıq Radiosu

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.