Bu gün, 15 mayda, Kişinyov şəhərində keçirilən Avropa Şurası Nazirlər Komitəsinin 135-ci sessiyasında çıxış edən Gürcüstanın xarici işlər naziri Maka Boçorişvili Ukraynaya dəstək, Rusiyanın təcavüzü və onun fikrincə Avropanın qarşısında duran çağırışlar barədə danışıb. Onun çıxışını Gürcüstan Xarici İşlər Nazirliyi yayıb.

Nazirin sözlərinə görə, Avropa üçün təhlükə yalnız müharibə deyil, həm də ikili standartlar, demokratik prinsiplərin seçici şəkildə tətbiqi və həqiqətin relativləşdirilməsidir.

O bildirib:

“Çıxışımın əvvəlində, Rusiyanın davam edən təcavüzü nəticəsində əziyyət çəkən Ukrayna xalqına qəti həmrəyliyimi ifadə etmək istəyirəm. Bu gün Avropa bir çox çağırışlarla üz-üzədir. Lakin müharibə və münaqişə Avropanın qurulduğu təməlləri sarsıdan yeganə təhlükə deyil. Həqiqətin relativləşdirilməsi, ikili standartlar, siyasi məqsədlər naminə dəyərlərin yenidən qiymətləndirilməsi və demokratiya adı altında demokratik prinsiplərin zəiflədilməsi də az təhlükəli deyil.”

Bu kontekstdə o, tədbiri işıqlandırmaq istəyən Gürcüstanın hökumətyönlü televiziya kanallarına Moldovaya giriş və akkreditasiya verilməməsi məsələsinə də toxunub və bildirib ki, Gürcüstana yönələn tənqidlər çox vaxt siyasi məqsədlərə xidmət edir və faktlara əsaslanmır.

“Bu gün görüşümüzü işıqlandırmaq istəyən Gürcüstanın üç müxtəlif televiziya kanalının jurnalistlərinə Moldovaya daxil olmaq və peşə fəaliyyətlərini həyata keçirmək qadağan edildi. Söz və media azadlığının seçici prinsiplərlə izah olunması narahatedicidir. Son illərdə ölkəmin tənqid edilməsi bəziləri üçün ən cəlbedici fəaliyyətə çevrilib. Tənqid demokratiyanın təbii hissəsidir, lakin siyasi məqsədlər faktlardan üstün tutulanda bu artıq demokratiyanın güclənməsinə yox, etimadın sarsılmasına xidmət edir.”

Moldova tədbirin işıqlandırılması üçün “İmedi”, “Rustavi 2” və “Postv” televiziya kanallarına akkreditasiya verməyib. Hər üç kanal Gürcüstanda hökumətyönlü media sayılır.

Nazir əlavə edib:

“Bir tərəfdən ‘demokratiyanın geriləməsindən’ narahat olmaq, digər tərəfdən isə seçkiləri qəbul etməyən radikal qüvvələri təşviq etmək ikiüzlülükdür.”

O həmçinin bildirib ki:

• “Gürcü xalqına dəstək” ifadə edib, eyni zamanda həmin xalqın seçdiyi hökumətlə nümayişkaranə uzaqlaşmaq;
• qanunun aliliyindən danışıb, eyni zamanda hüquqdan yayınma yolları axtarmaq;

Rusiyanın işğal etdiyi bir ölkəni Rusiyaya kifayət qədər müqavimət göstərməməkdə ittiham edib ona asanlıqla “prorus” damğası vurmaq —bunlar siyasi qiymətləndirmə deyil, reallığın sadələşdirilməsi və məsuliyyətdən qaçmaqdır.

Boçorişvili çıxışında Rusiyanın Gürcüstan ərazilərinin 20%-ni işğal etməsi, beynəlxalq məhkəmələrin bununla bağlı qərarları və Rusiyanın anneksiya istiqamətində atdığı addımlara da toxunub.

“Prinsiplərin qorunması bizim üçün xüsusi əhəmiyyət daşıyır — ərazilərinin 20%-i hələ də Rusiya tərəfindən işğal olunmuş və yüz minlərlə vətəndaşının evinə qayıtmaq hüququ əlindən alınmış bir ölkə üçün.”

O bildirib ki, işğal, effektiv nəzarət və Rusiyanın insan hüquqlarının ağır pozuntularına görə məsuliyyəti beynəlxalq məhkəmələr, o cümlədən Avropa İnsan Hüquqları Məhkəməsi tərəfindən təsdiqlənib.

Nazirin sözlərinə görə, buna baxmayaraq, Rusiya beynəlxalq öhdəliklərini görməzdən gəlməkdə davam edir və Gürcüstanın bölgələrinin anneksiyasına yönəlmiş addımlar atır. Buna misal olaraq o, 9 may 2026-cı ildə Moskva və Tsxinvali arasında imzalanmış yeni sazişi göstərib.

Sonda Boçorişvili vurğulayıb ki, Gürcüstan münaqişələrin sülh yolu ilə və hərtərəfli həlli siyasətinə sadiqdir və bölgədə sabitlik və təhlükəsizliyin qorunması üçün çalışır:

“Biz müharibənin qiymətini yaxşı bilirik və anlayırıq ki, sülh sadəcə hərbi eskalasiyanın olmaması deyil, həm də öz xalqımız, regionumuz və ümumi Avropa gələcəyi qarşısında məsuliyyətdir.”

Moldovada nə baş verir?
14–15 may tarixlərində Kişinyov şəhərində Avropa Şurası Nazirlər Komitəsinin iclası keçirilir.

İclasda üzv dövlətlərin xarici işlər nazirləri və digər yüksək səviyyəli nümayəndələr iştirak edirlər.

Nazirlər Komitəsi:

• prioritetləri müəyyən edir,
• qərarlar və tövsiyələr qəbul edir,
• Avropa İnsan Hüquqları Məhkəməsinin qərarlarının icrasına nəzarət edir,
• üzv dövlətlərdə insan hüquqları, demokratiya və hüququn aliliyinin təmin olunmasını izləyir.

Toplantıda həmçinin insan hüquqları, demokratiya və qanunun aliliyi sahəsində əldə edilən irəliləyişlər qiymətləndirilir və Avropanın yeni çağırışlarının həlli yolları müzakirə olunur.

Nazirin proqramında digər ölkələrin xarici işlər nazirləri ilə ikitərəfli görüşlər də var. Bildirilir ki, o, burada Andriy Sibiha ilə də görüşəcək.

Qeyd edək ki, Gürcüstan və Ukrayna arasında son illərdə münasibətlər gərgin olub; hazırda iki ölkənin paytaxtlarında səfirlər yoxdur və diplomatik münasibətlər müvəqqəti işlər vəkilləri səviyyəsindədir.

Həmçinin 4 mayda İrakli Kobaxidze və Volodimir Zelenski Yerevan şəhərində görüşüblər.

Mənbə: radiotavisupleba.ge

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.