Gürcüstan hökuməti Milli Yol Təhlükəsizliyi Strategiyasını və 2026–2027-ci illər üzrə Fəaliyyət Planını təsdiqləyib.

Hökumətin qiymətləndirməsinə görə, strategiya yollardakı mövcud vəziyyəti yaxşılaşdırmağı və beynəlxalq standartları tətbiq etməyi hədəfləyir. Bununla yanaşı, sənəddə qeyd olunduğu kimi, plan 2030-cu ilə qədər yol-nəqliyyat hadisələri nəticəsində həlak olanların və yaralananların sayını 25% azaltmağı nəzərdə tutur.

Sözügedən plan çərçivəsində uşaqların avtomobillərdə təhlükəsiz daşınması istiqamətində bir sıra qanunvericilik dəyişikliklərinin hazırlanması da nəzərdə tutulur.

"Xüsusi uşaq oturacaqlarının istifadəsi

istiqamətində qanunvericilik dəyişikliyinin həyata keçirilməsi planlaşdırılır. Buna əsasən, ilkin mərhələdə məktəbəqədər yaşlı uşaqlar üçün xüsusi avtomobil oturacaqlarının istifadəsi məcburi olacaq", — deyə sənəddə bildirilir.

Bununla yanaşı, müvafiq normativ bazanın yaradılması və keçid dövrünün nəzərə alınması ilə Yol Təhlükəsizliyi Fəaliyyət Planında uşaqların təhlükəsiz daşınmasına nəzarətlə bağlı Daxili İşlər Nazirliyinin müvafiq əməkdaşlarının ixtisasının artırılması məsələsi də əks oluna bilər.

Yeni strategiya uşaq oturacaqlarının istifadəsi barədə maarifləndirmə kampaniyalarının keçirilməsini də nəzərdə tutur.

Fəaliyyət planının tədbirlərinə yol təhlükəsizliyi istiqamətində məlumatlandırma və maarifləndirməyə yönəlmiş fəaliyyətlərin, o cümlədən uşaq oturacaqlarının istifadəsi ilə bağlı müvafiq sosial kampaniyanın həyata keçirilməsi daxildir.

Sənəddə həmçinin qeyd olunur ki, maarifləndirmə istiqamətində valideyinlər və uşaqlar üçün uyğunlaşdırılmış təhsil imkanlarını təmin edən yol təhlükəsizliyi üzrə vahid onlayn təhsil platformasının yaradılması məqsədəuyğundur.

Strategiya layihəsinə əsasən, yol təhlükəsizliyi mövzusunun məktəbəqədər təhsil proqramlarına da inteqrasiya edilməsi tövsiyə olunur.

Bununla belə, sənəddə vurğulanır ki, məktəbə hazırlıq proqramında yol təhlükəsizliyi mövzusu artıq nəzərdə tutulub və bunun çərçivəsində uşaqlar yaşayış mühiti, nəqliyyat növləri və küçədə hərəkət qaydaları ilə tanış olurlar.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---