İşğal olunmuş Abxaziyada Gürcüstanın nəzarətində olan ərazidən yanacağın qəbul edildiyini təsdiqləyiblər. Abxaziyanın de-fakto hökumətinin şərhini "Apsnypress" agentliyi yayıb.

Suxumidə bildirirlər ki, "Rusiya Federasiyasından yanacaq tədarükü bağlanmış müqavilələr çərçivəsində yenə də həyata keçirilir".

"Lakin xarici faktorların yaratdığı vəziyyət səbəbindən avtomobil yanacağı Abxaziya Respublikasının ehtiyacları üçün kifayət etmir. Bununla əlaqədar olaraq, alternativ mənbələrdən yanacağın mümkün tədarükü barədə qərar qəbul

edilib", — bəyanatda deyilir.

De-fakto hökumətin məlumatına görə, "yanacaq bazarının iştirakçıları Gürcüstan ərazisindən benzinin tədarükü imkanını tapmağa müvəffəq olublar".

"Məlum olduğu kimi, müharibədən sonrakı 90-cı illərdə Abxaziya Respublikası ərazisindən də Gürcüstana tədarük həyata keçirilirdi", — bəyanatda vurğulanır.

Yenilənmə: "Apsnypress" tərəfindən yayılan şərhdə həmçinin qeyd olunmuşdu: "(Yanacaq bazarında) gərginliyi azaltmaq məqsədilə Gürcüstandan avtomobil yanacağının idxalına mane olunmaması qərara alınıb, digər böhran vəziyyətlərində də belə olunurdu"; "Abxaziya hakimiyyəti respublikaya digər ölkələrdən yanacaq-sürtkü materiallarının gətirilməsinə mane olmayacaq və yanacaq bazarının iştirakçılarına bu işdə köməklik göstərməyə hazırdır". Az sonra bu hissə şərhdən silinib.

"İşğal haqqında qanun çərçivəsində"

"Biz çatdırmamışıq, biznes çatdırıb", — deyə İrakli Kobaxidze avqustun 12-də Hökumət Administrasiyasında keçirilən brifinqdə bildirib. O, Abxaziyada yanacaq qıtlığı ilə bağlı "TV Pirveli"nin sualını cavablandırıb.

"Ümumiyyətlə, bizim qüvvədə olan qanunvericilik çərçivəmiz, o cümlədən 'İşğal haqqında' qanun buna imkan verir. Əgər belə bir addım atılıbsa və atılacaqsa, bütün bu addımlar 'İşğal haqqında' qanun çərçivəsində atılacaq", — deyə Baş nazir bildirib.

Kobaxidzenin bəyanatına görə, əgər Gürcüstan hökuməti Abxaziyada yaşayan əhalinin vəziyyətini yüngülləşdirə bilərsə, bu, "İşğal haqqında qanun çərçivəsində" olunacaq.

Gürcüstanın işğal olunmuş ərazilər haqqında qanununa əsasən, işğal olunmuş ərazilərdə təsərrüfat fəaliyyətinin həyata keçirilməsinə yalnız müstəsna hallarda, Gürcüstan hökumətinin hüquqi aktı ilə müəyyən edilmiş qaydada xüsusi razılıqla icazə verilir — bir şərtlə ki, bu, Gürcüstanın dövlət mənafelərinə, münaqişənin dinc yolla həllinə, de-işğala, müharibədən zərər çəkmiş əhali arasında etimadın bərpasına və ya humanitar məqsədlərə xidmət etsin.

Müxalifətin tələbi

Gürcüstan müxalifətinin nümayəndələri işğal olunmuş Abxaziyaya yanacaq tədarük edən şirkətin adının açıqlanmasını tələb edirlər.

Müxalif "Dəyişiklik üçün Koalisiya" birliyinin lideri Nika Qvaramiya bəyan edir ki, "Gürcüstanın təhlükəsizlik və ərazi maraqları, həmçinin Rusiyaya qarşı tətbiq edilən Qərb sanksiyaları nəzərə alınaraq, Rusiyanın nəzarətində olan əraziyə yanacaq gətirilməsi qanunla icazə verilən humanitar və ya sosial-iqtisadi məqsədlərlə əsaslandırıla bilməz".

"Vahid Milli Hərəkat"ın liderlərindən biri İrakli Pavlenişvilinin qiymətləndirməsinə görə, "Gürcü Arzusu"nun bu benzinin, o cümlədən Qalidə yaşayan gürcülərin ehtiyaclarına xidmət etməsi barədə arqumenti "tamamilə inandırıcı deyil".

"Bizdə olan məlumata görə, tədarük olunan yanacağa tam olaraq işğalçı rejim və Gürcüstanın azğın düşməni sərəncam verir", — deyə Pavlenişvili bildirir.

Turizm mövsümünün pik nöqtəsində işğal olunmuş Abxaziyada benzin və dizel yanacağının kəskin qıtlığı yaşanır. Buna səbəb Rusiyadan yanacaq tədarükündə yaranan fasilələrdir ki, bu da öz növbəsində Ukraynanın neft emalı və digər energetika obyektlərinə endirdiyi zərbələrlə bağlıdır.