Bolqarıstan sahillərində dron gəmini batırıb. Yaralılar arasında azərbaycanlılar da var
Bolqarıstanın Qara dəniz sahillərində iki gəmiyə dron hücumu olub və onlardan biri batıb. Bu haqda baş nazir Rumen Radev oktyabrın 13-də məlumat verib. "Reuters" yazır ki, bu, bir həftə ərzində baş verən ikinci belə hadisədir.

Radevin sözlərinə görə, Malta bayrağı altında üzən "Chelsea 3" gəmisi gecə saatlarında üç dronun hücumuna məruz qalaraq zədələnib. Gəminin 7 ukraynalı
və 8 azərbaycanlıdan ibarət heyəti xilas edilib. Ciddi xəsarət alan olmasa da, beş heyət üzvünə tibbi yardım göstərilib.

Baş nazir batmış gəminin heyət üzvlərindən birinin də xilas edildiyini deyib. Radev televiziya ilə yayımlanan müraciətində bu hücumu "tamamilə qəbuledilməz" adlandırıb və NATO-nun baş katibi Mark Rutte ilə danışacağını söyləyib.

O bildirib ki, hücumu kimin etdiyinə dair ortada açıq-aydın sübut yoxdur, lakin bu hadisənin nəticələri Rusiya Federasiyasının xeyrinə deyil. Baş nazir həmçinin məsələ ilə bağlı Rusiya səfirini çağıracağını vurğulayıb.

Ukraynanın xarici işlər naziri Andriy Sibiqa isə "X" platformasındakı paylaşımında baş verənləri Rusiyanın hücumu adlandırıb. Nazir tərəfdaşları Rusiyaya təzyiqi artırmağa və sanksiyaları gücləndirməyə çağırıb.

6 oktyabr
XİN: Dron hücumunda Azərbaycan vətəndaşlarından kapitan həlak olub, heyət üzvü itkin düşüb
Oktyabrın 5-də Qara dənizdə, Rumıniya sahilləri yaxınlığında "Röyad Məmmədov" adlı xarici yük gəmisinə dron hücumunda Azərbaycan vətəndaşı həlak olub.

Bu barədə Azərbaycan Xarici İşlər Nazirliyinin (XİN) açıqlamasında bildirilir.

Nazirliyə daxil olan məlumata əsasən, hücum nəticəsində Azərbaycan vətəndaşı, gəminin kapitanı ölüb.

24 yaşlı daha bir Azərbaycan vətəndaşının isə itkin düşdüyü qeyd edilir: "Hal-hazırda, müvafiq axtarış-xilasetmə tədbirləri həyata keçirilir. Gəmi heyətində olan digər vətəndaşlarımız xilas edilib, onlardan üç nəfəri xəstəxanaya yerləşdirilib".

XİN Azərbaycan vətəndaşlarını hərbi əməliyyat zonalarına səfər etməməyə və riskli marşrutlar üzrə hərəkət edən gəmilərdə işləməkdən bir daha çəkinməyə çağırıb.
Məsələyə, hələlik, kapitanın və itkin düşdüyü bildirilən heyət üzvünün yaxınlarından isə münasibət almaq mümkün olmayıb.

+++

Oktyabrın 5-də Qara dənizdə, Rumıniya sahilləri yaxınlığında dron hücumuna məruz qalan "Röyad Məmmədov" yük gəmisi "PALMALI" Şirkətlər Qrupunun istismarında olub.

Şirkətin yaydığı məlumata görə, gəmi Ukraynanın İzmail limanından İtaliyanın Ravenna limanına doğru hərəkət edirmiş.

Rusiya Qara dənizdə azərbaycanlıların da olduğu Türkiyə gəmisini vurub
Rusiyaya məxsus iki dron Türkiyənin qarğıdalı daşıyan yük gəmisinə hücum edib. Bu barədə Volodimir Zelenski məlumat verib. Onun sözlərinə görə, zərbə nəticəsində gəminin kapitanı həlak olub. Göyərtədə Azərbaycan və Hindistan vətəndaşları olub.

Hadisə barədə ilk olaraq Rumıniya mediası xəbər yayıb. "Romania Journal" nəşrinin məlumatına görə, bazar ertəsi səhər saatlarında Qara dənizin Rumıniya şelfində, "Neptune Deep" qaz hasilatı platformalarının yaxınlığında dronlar "Royad Mammadov" gəmisinə hücum edib. Rumıniya Daxili İşlər Nazirliyinin açıqlamasına əsasən, iki nəfər həlak olub, heyətin 11 üzvü isə xilas edilib.

9 sentyabr
Qara dənizdə yük gəmisinə dron hücumu — İki Azərbaycan vətəndaşı həlak olub

Qara dənizdə xarici yük gəmisi dron hücumuna məruz qalıb. İki Azərbaycan vətəndaşı həlak olub, daha ikisi yaralanıb.

Bu barə Azərbaycan Xarici İşlər Nazirliyinin (XİN) sentyabrın 10-da yaydığı məlumatda bildirilir.

XİN-in məlumatına görə, sentyabrın 9-da Qara dənizdə heyətində Azərbaycan vətəndaşlarının da olduğu "TEDY" adlı xarici yük gəmisi dron hücumlarına məruz qalıb.
Əlavə edilir ki, hücum nəticəsində iki Azərbaycan vətəndaşının həlak olduğu, daha iksinin isə xəsarət aldığı barədə məlumat daxil olub. "Yaralılar Ukraynanın Çernomorsk şəhər xəstəxanasında yerləşdiriliblər", - nazirlik bildirir.

XİN Azərbaycan vətəndaşlarını hərbi əməliyyatların getdiyi təhlükəli bölgələrə səfər etməkdən, orada çalışmaqdan və bu ərazilərdən keçən nəqliyyat vasitələrində işləməkdən çəkinməyə çağırır.

Bu açıqlamaya həlak olan və yaralanan Azərbaycan vətəndaşlarının yaxınlarından münasibət almaq mümkün olmayıb.

Rusiya zərbəsi
XİN gəminin dəqiq harada hücuma məruz qaldığını və dronların hansı ölkəyə məxsus olduğunu bildirməyib. Amma Rusiya Müdafiə Nazirliyinin açıqlamasından zərbənin Odessa sahilləri yaxınlığında Rusiya dronları ilə endirildiyi anlaşılır.

Nazirlik sentyabrın 9-da axşam saatlarında Odessa limanında gəmiləri müşayiət edən bir yedək gəmisinin vurulduğunu bildirib. Sentyabrın 10-da səhər isə Ukrayna Silahlı Qüvvələri üçün yük daşıdığı iddia edilən daha iki quru yük və bir yedək gəmisinin vurulduğunu açıqlayıb.

"ASTRA" gəmi izləmə xidmətlərinə istinadən qeyd edir ki, "TEDY" Somali bayrağı altında üzən, təxminən 30 metr uzunluğunda dəniz yedək-təchizat gəmisidir. Uzunluğu təxminən 30 metrdir. Onun son mövqeyi sentyabrın 7-də Qara dənizdə, Rumıniyanın Konstansa limanı yaxınlığında qeydə alınıb.

Xatırlatma
Bu, XİN-in müharibə bölgələrindəki gəmilərdə Azərbaycan vətəndaşlarının həlak olması ilə bağlı yaydığı ilk məlumat deyil. Nazirlik bu ilin iyununda bildirmişdi ki, Azov dənizində "Natra" və "Zirkon" yük gəmilərinə dron hücumları nəticəsində heyətlərdəki 25 Azərbaycan vətəndaşından dördü həlak olub, dördü isə yaralanıb.

İyulun 14-də isə Ukraynanın Odessa sahilləri yaxınlığında Türkiyənin "Okean Maritime" şirkətinə məxsus "Atlas Bey" mülki ticarət gəmisinin dron hücumuna məruz qaldığı açıqlandı. Həmin vaxt göyərtəsində 11 Azərbaycan vətəndaşının olduğu, kapitan istisna olmaqla, digər heyət üzvlərinin Odessada sahilə çıxarıldığı bildirilmişdi. Sonradan azərbaycanlı gəmi kapitanının həlak olduğu məlum olmuş və onun nəşi tapılmışdı.

Müstəqil ekspertlər deyirlər ki, təhlükəli ərazilərdə nəqliyyat vasitələrində çalışmağın köklü səbəbləri var. Onların qənaətinə görə, bu, həm də Azərbaycanda bir çox insanın normal dolanışığını təmin edə bilməməsindən irəli gəlir və yaranmış vəziyyətə görə fərdlərlə yanaşı, hökumət də məsuliyyət daşıyır.

Mənbə: Azadlıq Radiosu


Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!
Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415
Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:

# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.

Print Email
FaceBook Twitter Google