Azərbaycan İranla sərhəddi bağladı
Azərbaycanın Biləsuvar gömrük sərhəd buraxılış məntəqəsi artıq 1
saatdır ki, koronavirus təhlükəsi ilə əlaqədar olaraq fəaliyyətini
dayandırıb.
"Marneuli" radiosu "Report"a istinadən xəbər verir ki, məntəqənin
nə vaxt açılacağı məlum deyil.
Məlumata görə, keçid məntəqəsindən İran tərəfdən yalnız Azərbaycan
vətəndaşları, Azərbaycan tərəfindən isə İran vətəndaşlarının
keçidinə icazə verilir.
Koronavirusa görə, Azərbaycanın Xarici İşlər Nazirliyi (XİN) İrana
səfər edən vətəndaşlaraına da müraciət edib.
Nazirliyin müraciətində deyilir: "Azərbaycan
Respublikasının Xarici İşlər Nazirliyi son zamanlar yeni növ
təhlükəli virusun (coronavirus 2019-nCoV) yaxın bölgəmizdə
yayılması təhlükəsini nəzərə alaraq və İran İslam Respublikasının
rəsmi qurumlarının bu xüsusda yaydığı xəbərdarlığa istinad edərək,
Azərbaycan Respublikasının vətəndaşlarını İran İslam Respublikasına
səyahət edərkən, xüsusilə də ziyarət səfərləri zamanı son dərəcə
ehtiyatlı olmalarını, Ümumdünya Səhiyyə Təşkilatının tövsiyələrinə
əməl etmələrini tövsiyə edir.
Hər hansı problemlə üzləşdikləri zaman Azərbaycan vətəndaşlarından
Azərbaycan Respublikasının Tehran şəhərindəki Səfirliyinə və ya
Təbriz şəhərindəki Baş Konsulluğuna müraciət etmələri tövsiyə
olunur.
Azərbaycan Respublikasının xarici ölkələrdəki bütün səfirlik və
konsulluqlarının ünvanları Azərbaycan Respublikası Xarici İşlər
Nazirliyinin internet səhifəsində (www.mfa.gov.az)
yerləşdirilmişdir. Xarici ölkələrdə daimi, müvəqqəti yaşayan və
olan Azərbaycan Respublikasının vətəndaşlarına fövqəladə hallar və
digər təhlükələr zamanı lazımi kömək göstərilməsi üçün səfirlik və
konsulluqlarla əlaqə saxlamaları, konsulluq qeydiyyatına durmaları
tövsiyə olunur", - bəyanatda deyilir.
Xatırladaq ki, İranda virusdan ölənlərin sayının altıya çatdığı və
28 nəfərin isə yoluxduğu bildirilir. Qeyd edək ki, İranda
koronavirusa ilk yoluxma fevralın 19-da qeydə alınıb.