Yeni Düşüncə İnstitutunun başlatdığı
“#NTİevinizdə” kampaniyası çərçivəsində
keçirilən şeir müsabiqəsinin qalibləri məlum oldu.
20 aprel tarixindən başlayan müsabiqəyə Marneuli, Bolnisi və
Telavidən olan gənclər maraq göstəriblər. Onlar azərbaycan, türk,
gürcü və rus dillərində tanınmış şairlərin yazdığı şeirləri
səsləndirərək “NTİ”-ın rəsmi “Facebook” səhifəsinə göndəriblər.
Yeni Düşüncə İnstitutunun təsisçilərindən Kamran Əfəndiyev bildirdi
ki, müsabiqədə 1-ci yerin qalibi 476 səslə Günel Cəlilova, 2-ci
yerin qalibi 420 səslə Arzu Osmanova və 3-cü yerin qalibi 293 səslə
Aysun Əhmədova olub.
Əfəndiyev deyir ki, qalibləri bəyənmə sayı və paylaşım sayına görə
deyil, baxış sayının çoxluğu əsasında müəyyən ediblər. Onun
sözlərinə görə, yaxın günlərdə qalibləri bir araya toplayaraq
təxminən 80 lari dəyərində olan müxtəlif texnoloji avadanlıqlar
hədiyyə ediləcək. Kamran bildirdi ki, son zamanlar dərslərin onlayn
şəkildə keçirilməsinə görə şagirdlərin daha çox texnoloji
avadanlıqlara ehtiyacları olur. Buna görə də onlar hədiyyə
seçimində daha çox texnoloji avadanlıqlara üstünlük verəcəklər.
Müsabiqədə Mollaoğlu ictimai məktəbinin 11-ci sinif şagirdi, NTİ-ın
üzvü Günel Cəlilova Azərbaycanın görkəmli şairi Nüsrət Kəsəmənlinin
“İçində” şeirini səsləndirərək izləyicilərin say çoxluğuna görə 476
səslə 1-ci yerin qalibi olub.
Cəlilova “Marneuli” radiosu ilə söhbəti zamanı bildirdi ki, ölkədə
koronavirusla əlaqədar yaranmış fövqəladə vəziyyətə görə o,
vaxtının evdə elə də maraqlı keçmədiyi üçün müsabiqəyə qatılıb. O,
deyir ki, müsabiqədə qalib olmaq kimi fikri olmayıb, sadəcə əyləncə
və maraq üçün müsabiqənin iştirakçılarından biri olmaq qərarına
gəlib.
“Birinci yerin qalibi oluğuma görə çox sevindim, amma
qalib olmaqdan daha çox dostlarımın mənə dəstək olduqlarına görə
sevinirəm”, – Günel Cəlilova dedi.
O, deyir ki, müsabiqədə özünə və səsinə güvənən hər kəs
qalibdir.
Xatırladaq ki, Yeni Düşüncə İnstitutunun təsisçiləri Ariz
Daşdəmirov və Kamran Əfəndiyev
“#NTİevinizdə” kampaniyasına ilk olaraq
nağıllar hazırlamaqla başlayıblar, daha sonra isə gənclərin
vaxtlarını daha səmərəli keçirmələri üçün onlar şeir müsabiqəsinə
start veriblər.
Şeir müsabiqəsi bitdiyinə görə onlar yaxın günlərdə xalq
mahnılarından ibarət musiqi yarışmasına start verəcəklər.