“Gürcü Arzusu”-nun Sadaxlı ərazi vahidliyindən majoritar
deputatlığa namizədi Rövşən İsgəndərov “Marneuli” radiosu ilə
söhbəti zamanı ötən gün, 30 sentyabr tarixində, baş vermiş
hadisələr barədə danışdı.
İsgəndərovun bildirdiyinə görə, Laşa Kveladze Kirovka kəndində ona
hücum edib və onu döyüb, təhqir edib.
“Kənddə məktəb divarında yazı yazırdı. Mən insan olaraq
maşını saxladım və dedim ki, bu yazını yazmasın. Sonra Laşa məni
təhqir etməyə başladı. Mənə deyirdi hamı layiq olduğu cavabı alacaq
və bax, Mişa qayıdır. Sonra mənə hücum etdi və döydü. Mən bu zaman
dostlarımla birlikdə idim, Kveladze ilə daha iki nəfər var idi. O,
adamlar da Laşaya deyirdilər ki, vurma, ancaq onlara qulaq
asmırdı”, – Rövşən İsgəndərov bildirdi.
Laşa Kveladze 30 sentyabr tarixində baş vermiş hadisələrlə bağlı
fərqli danışır və bildirir ki, İsgəndərov özü ona hücum edib.
Majoritar deputatın yanında isə 30-a yaxın adam olub. Rövşən
İsgəndərov Kveladzenin ittihamını təkzib edir.
“Əgər mənim yanımda 30 adam var idisə, o zaman niyə
xəsarət almışam, burnum qırılıb, Laşaya isə heç nə olmayıb. Yanımda
30 adam var idisə, o zaman niyə belə oldu? 30 deyil, lazım gələrsə,
oraya minlərlə adam çıxardı və bütün Sadaxlı ayağa qalxardı. Sadəcə
mən qarşıdurma istəmirdim, hamıdan xahiş etdim ki, əl
qaldırmasınlar, hamını dayandırdım.”
İsgəndərovun sözlərinə görə, Kveladze onu döydükdən sonra əhali
hadisə yerinə toplaşıb. O, bildirdi ki, əhali onu qanlı vəziyyətdə
görüb və buna görə maşınları saxlayıblar.
Rövşən İsgəndərov Marneuli “Geo Hospitals” klinikasını burun sınığı
diaqnozu ilə bu gün, 1 oktyabr tarixində tərk edib. Onun “Marneuli”
radiosu ilə söhbəti zamanı bildirdiyinə görə, seçkilərdən bir gün
sonra, 3 oktyabr tarixində əməliyyat olunacaq.
Baş vermiş faktla bağlı Gürcüstan Cinayət Məcəlləsinin 126-cı
maddəsi ilə istintaq aparılır. Həmin maddə zorakılığı nəzərdə
tutur. İsgəndərovun sözlərinə görə, onda hadisəni təsvir edən
video/foto material yoxdur. Ancaq polislər istintaq aparırlar və
nəticədə günahkarlar qanun qarşısında cavab verəcək.