2008-ci ilin avqust müharibəsinin iştirakçıları Davit Kimadze və
Quram Barbakadze bildirirlər ki, müharibədə bütün əsgərlər
qəhrəmandır. İllər əvvəl hərbçilər böyük psixoloji stress
keçiriblər.
Onların sözlərinə görə, əgər lazım gələrsə, ölkəni qorumaq üçün
yenə eynisini edərlər. Kimadze bildirdi ki, müharibənin
təəssüratları və oradakı ağrı əsgərin həyatının sonuna qədər davam
edir. Ancaq, bildirdi ki, müharibədən sağ qayıtmış veteranlara
dəyər verilmir, dövlət yalnız müharibədən qayıtmayanların ailəsinə
hörmət edir. Quram Barbakadze bildirdi ki, dövlətin müharibə
veteranlarına 22 lari əlavə verməsi onun üçün təhqirdir və indiyə
qədər həmin pulu qəbul etmək istəyi olmayıb. Çünki müharibədə əsgər
ölkə üçün 22 laridən daha artıq iş görür. Ən əsası isə onlar heç
vaxt dövlətdən hörmət hiss etmirlər.
"Bizim dövlətdə əsgər müharibədə ya ölməlidir, ya da
fiziki xəsarət almalıdır. Yalnız onda qəhrəman sayılırlar və onlara
qiymət verilir. Cəbhənin ön xəttindən sağ qayıdan, yoldaşları gözü
qarşısında öldürülənlər deyil. Dövlət bizi müharibədən qayıtmayan
adamlardan ayırır. Sanki biz ölkəmiz üçün heç nə etməmişik. Bütün
əsgərlər qəhrəmandır. Müharibədən sonra mən sağlamlığımı itirdim.
Psixoloji baxımdan məhv olmuşdum, indi də belədir. Təxminən iki il
ərzində su içə, yemək yeyə bilmirdim. Dostlarımın necə həlak olduğu
yadıma düşürdü. Dövlət indi bizə 22 lari dəyər verir. Bizim üçün
heç bir tibbi güzəşt də yoxdur", – Kimadze
bildirdi.
Quram Barbakadzenin sözlərinə görə, Gürcüstanda əsgərlərə yalnız
dünyasını dəyişdikdən sonra qiymət verirlər.
“Gürcüstanda, təəssüf ki, müharibə veteranlarına hörmət
etmirlər. Əsgərlərə yalnız dünyasını dəyişdikdən sonra qiymət
verirlər. Heç onda da müvafiq şəkildə qiymətləndirmirlər. Mənim
üçün bu 22 larilik təqaüd təhqirdir. Çox veteranlar belə düşünür.
Bəzi əsgərlərin işi də, heç bir gəliri də yoxdur. Belə olan halda
bu 22 larilik əlavə hər ay çox az adama yardım göstərəcək. Ölkəni
qorumaq üçün əsgər ölümə gedir və o,
qiymətləndirilməlidir”, – Barbakadze bildirdi.
17 oktybar tarixində, Gürcüstanda veteranlar gününə həsr edilmiş
tədbirdə, Gürcüstanın Baş naziri İrakli Qaribaşvili bildirib ki,
yanvar ayından veteranların aylıq əlavəsi 22 lari, 5-dəfə
artırılacaq.
Davit Kimadzenin sözlərinə görə, illər əvvəl təyin edilmiş 22 lari,
bu gün 5 dəfə artırılmış dəyərə bərabərdir. Çünki ölkədə hər şeyin,
xüsusilə tibb sahəsində qiymətlər artıb.
“Mən həmin 22 larini alıram, ancaq 5 dəfə artırılacağı
halda həmin pul illər əvvəl nə demək idisə, elə olduğu kimi də
qalır. Çünki hər şey bahalaşıb. Veteranlara heç bir hörmət yoxdur,
faktiki olaraq gözümüzə kül üfürürlər. Bizim ölkədə 22 larilik
əlavə bir yana qalsın, müharibə veteranlarına tibbi güzəşt belə
yoxdur”, – Kimadze bildirdi.
Marneuli Sosial Xidmət Agentliyində hələ ki, müsahibə verməkdən
çəkinirlər. Çünki məsələ ideya səviyyəsindədir və qanunvericilikdə
dəyişiklik edilməyib.
“Baş-nazir səsləndirdi, amma qanunvericilik
səviyyəsində hələ heç nə yoxdur. Qərar çıxmalıdır, yaxud dəyişiklik
qüvvəyə minməlidir. Sonra Səhiyyə Nazirliyi bizə qeyd bildirir. Ona
qədər müsahibə verə bilmərəm. Hələ ideya səviyyəsindədir və bu
halda müsahibə vermək düzgün olmaz. Həmin 22 lari kommunal xərclər
üçün nəzərdə tutulmuşdu. Ancaq şəxsə adi, pensiya şəklində hesaba
köçürdü. İdeyada var ki, həmin 22 lari beş qat artırılsın – yəni,
təxminən, 120 lariyə qədər artsın. Ancaq təmiz şəkildə
verilməlidir”, – Marneuli Sosial Xidmət Agentliyindən
bildirdilər.
Gürcüstanda veteranlar günü 2014-cü ildən qeyd olunur. 1995-ci ilin
17 oktyabr tarixində Gürcüstan Parlamenti “müharibə və silahlı
qüvvələr veteranları barədə” qanun qəbul edib. Bu isə sonradan
veteranlar gününün təyin edilməsi üçün əsas oldu.