Bu gündən Gürcüstanda “COVID-19” pandemiyası ilə əlaqədar “yaşıl
pasport” sisteminin tətbiqinə başlanılıb.
Yeni qaydalara əsasən, dekabrın 1-dən qonşu ölkədə iaşə obyektləri
və əyləncə mərkəzlərinə, otellərə, konoteatr, opera salonlarına,
muzeylərə, konsert zallarına, dağ kurort kanat yollarına, spa,
idman salonlarına və digər bu kimi qapalı ictimai məkanlara yalnız
“yaşıl pasport”u olan şəxslərin daxil olmasına icazə veriləcək.
“COVID-19” əleyhinə vaksinin hər iki dozası ilə tam peyvənd olunan,
son 72 saat ərzində PZR testindən keçib neqativ cavab alan, 24 saat
etibarlılığa malik antigen testi olan, eləcə də son 6 ay ərzində
xəstəliyə yoluxub sağalan şəxslərin “yaşıl status”a malik olacağı
bildirilib.
Yeni qaydanın yaşı 18-dən çox olan bütün vətəndaşlara və xarici
ziyarətçilərə tətbiq ediləcəyi bildirilib.
Avropa İttifaqının (Aİ) Rəqəmsal COVID Sertifikat sisteminə üzv
olmayan ölkələrin vətəndaşları Gürcüstanda “yaşıl status”u yalnız
ölkəyə daxil olduqdan sonra ala bilərlər.
Bunun üçün ziyarətçilər Gürcüstan Səhiyyə Nazirliyi tərəfindən
yaradılmış “CovidPass Georgia” proqramından istifadə edərək
qeydiyyatdan keçməlidirlər.
Mənbə: apa.az