30 noyabr tarixində, “Qadınlar Birliyi” Xuldərə İcma Mərkəzində
görüş keçirib. Təşəbbüs qrupunun nümayəndələri məktəb şagirdlərinə
kompüter bacarıqları kursu keçiblər.
Birliyin təsisçilərindən İradə Əfəndiyeva bildirdi ki, hazırda
“People in need”-in dəstəyi ilə həyata keçirdikləri layihə
ictimaiyyətin ehtiyacları üçün nəzərdə tutulub. Söhbət kompüter
proqramı “Teams”-in və gürcü dilinin tədrisindən gedir.
Əfəndiyevanın sözlərinə görə, artıq iki ildir öz icmalarının
gücləndirilməsinin qayğısına qalırlar.
“Bu iki il ərzində, iki kəndin qadınları ilə birlikdə
sorğu apardıq. Sorğunun məqsədi kəndin və əsasən qadınların
problemlərinin müəyyən edilməsi idi. Buraya su, yol, məktəb
problemi daxil idi və bunu qadınlarla birlikdə həll etdik. Ayda bir
dəfə bu qadınlarla sorğu aparırıq və hansı problemlərin qalıb,
yaxud həll etmişik – ona baxırıq. Bu il “People in need”
çərçivəsində iki layihə qazandıq və layihələrin əsas məqsədi
qadınların gücləndirilməsi, onların hüquqlarının müdafiəsi idi. Bu
layihə çərçivəsində müəllimlər, uşaqlar və valideynlər üçün
müxtəlif təlimlər keçirik”.
“Qadınlar Birliyinin” daha bir təsisçisi Hənifə Əfəndiyeva bildirdi
ki, onların fəaliyyətləri əsasən qadınların gücləndirilməsinə,
icmadakı problemlərin həlli və təşviqinə istiqamətlənib.
Əfəndiyevanın sözlərinə görə, layihəyə iki il əvvəl başlayıblar və
QHT-nin köməyi ilə bir çox qadının iqtisadi baxımdan
gücləndirilməsinə nail olublar. Məhz bu addım onlar üçün
dayanmamağa və müxtəlif qrantlar qazanmağa əsas olub.
“Biz ilk dəfə “Taso” fondunun dəstəyi ilə bu layihəyə
başladıq və qadınlar qrupu yaratdıq. Qrup “Qadınlar Birliyi”
adlanır. Bu qrupda iki kəndin qadınları birləşib və ümumilikdə 29
qadın var. Biz birlikdə “Taso” fonduna layihə yazıb verdik,
layihənin məqsədi qadınların maddi, iqtisadi baxımdan
gücləndirilməsi idi. 15 qadının artıq maliyyəsi var və biznes
qurub. Onlar arasında, lavaş evi, şirniyyat evi, gözəllik salonu,
istixanalar yer alır. Bundan sonra biz dayanmadıq və müxtəlif
donorlara layihələr göndərdik. Məsələn, ötən il “Qadınlar Fondu
Gürcüstan üçün” layihəmiz var idi, qalib gəldik və bizim kəndin
girişində, zibillik olan ərazini təmizlədik, park
düzəltdik”.
“Qadınlar Birliyinin” məqsədi kənddə yaşayan qadınların
problemlərinin müəyyən edilməsi, onların həlli və qadınların
gücləndirilməsidir.