“Azərbaycan işğal faktorunu aradan qaldırıb və regional
əməkdaşlığa hazırdır. “3+3” formatı da region ölkələri və bütün
qonşularla əməkdaşlığa yönəlib”.
Bunu Beynəlxalq Münasibətlərin Təhlili Mərkəzinin (BMTM) İdarə
Heyətinin sədri Fərid Şəfiyev jurnalistlərə Gürcüstanın Baş naziri
İrakli Qaribaşvilinin bölgədə “Dinc Qonşuluq Təşəbbüsü”nü şərh
edərkən deyib.
Onun sözlərinə görə, son aylar ərzində atılan addımlar Azərbaycanın
praktiki olaraq dinc qonşuluq siyasətini həyata keçirdiyini
göstərir.
F.Şəfiyev qeyd edib ki, Gürcüstan “3+3” formatına dəvət olunub və
ölkənin təşəbbüsə qoşulmamasının səbəbi bəllidir:
“Qapılar açıqdır və Gürcüstan nə zaman münasib bilsə,
formatda təmsil oluna bilər. Azərbaycan Gürcüstanla birbaşa və
Türkiyə ilə birgə üçtərəfli formatda əməkdaşlığını davam
etdirəcək”.