Çərşənbə axşamı Vaşinqton Ermənistan-Azərbaycan sərhədinin
delimitasiyasına və demarkasiyasına yardım etmək təklifini təkrar
edib.
Dövlət katibi Entoni Blinken Ermənistan baş naziri Nikol Paşinyanla
söhbət edib.
"Onlar son həftələr Cənubi Qafqazda müşahidə olunan
müsbət dinamikanı müzakirə ediblər", – deyə Dövlət
Departamentinin rəsmi nümayəndəsi Ned Prays gündəlik brifinqdə
Turan-ın zəng haqqında sualına cavabda bildirib və bir qədər sonra
daha ətraflı hesabat verməyi vəd edib.
Dövlət Departamentinin çərşənbə axşamı yaydığı məlumatda deyilirdi
ki, dövlət katibi Blinken "sərhədlərin delimitasiyasına və
demarkasiyasına ABŞ-ın yardımını təklif edib və regional nəqliyyat
və kommunikasiya əlaqələrinin inkişafında irəliləyiş əldə etməyə
çağırıb".
Blinken həmçinin Cənubi Qafqazdakı problemlərin həlli üçün
ikitərəfli dialoqun davam etdirilməsinin vacibliyini vurğulayıb və
ABŞ-ın prezident Əliyev və baş nazir Paşinyan arasında Aİ-nin
vasitəçiliyi ilə aparılan danışıqları dəstəklədiyini təsdiq
edib.
Dövlət katibi Blinken həmçinin ABŞ-ın "ATƏT-in Minsk Qrupunun
həmsədri qismində Ermənistanın və Azərbaycanın uzunmüddətli
hərtərəfli sülh əldə etməsinə kömək etməyə" hazır olduğunu təsdiq
edib, deyə Dövlət Departamentinin məlumatında bildirilir.
Blinken həmçinin regionda və ümumilikdə sülhü, sabitliyi və
tərəqqini təmin etmək üçün Ermənistan və Türkiyə arasında
münasibətlərin normallaşmasının əhəmiyyətini qeyd edib.
Mənbə: turan.az