Hələ də çəkilməkdə olan Marneuli-Lomtaqora-Alqeti avtomobil yolunun
asfalt qatı artıq sıradan çıxıb.
“Marneuli” radiosu bu məsələ ilə bağlı 10 gün əvvəl
material hazırlamışdı.
Həmin yoldan istifadə edən sürücülər bizimlə söhbətləri zamanı
bildirmişdilər ki, tikintinin başlaması onlar üçün sevindirici
olub. Ancaq hələ təmiri başa çatmamış asfalt qatının sıradan
çıxması problemi yenə yaranıb. Məsələ ilə bağlı indiyə qədər bir
neçə dəfə Avtomobil Yolları Departamenti ilə əlaqə yaratmağa
çalışdıq.
Bu gün isə “Facebook” səhifələrinə yazdıq və cavab olaraq
bildirdilər ki, Marneuli-Lomtaqora-Algeti avtomobil yolunun qeyd
olunan hissəsində baş vermiş vəziyyət haqqında məlumatları var və
təmir üçün səlahiyyətli şirkətə artıq tapşırıq verilib.
“Səlahiyyətli şirkətə tapşırıq verilib, onlar qısa müddətdə bunu
aradan qaldırmalıdırlar. Qeyd edək ki, bu çatışmazlıqlar avtomobil
yolunun aşağı qatında qeydə alınıb. Təəssüf ki, bu iş prosesində
tez-tez baş verən hallardır. Sonradan mütləq düzəldilir. Müqaviləyə
görə, işin başa çatma müddəti cari ilin 31 avqust
tarixidir”, – Departamentdən bildirdilər.
Marneuli-Lomtaqora-Algeti avtomobil yolu 15 kilometr uzunluğundadır
və beynəlxalq əhəmiyyətli Tbilisi-Qırmızı Körpü avtomagistaralına
birləşir. Həmin yol vasitəsi ilə Marneulidən Rustaviyə qısa
müddətdə getmək mümkündür. Yolun layihəsi mərkəzi büdcədən
maliyyələşdirilir və onun dəyəri 12,6 milyon laridir. Yolun təmir
işləri 31 avqust 2022-ci il tarixinədək başa çatmalıdır.