Marneulili mülki fəal və hüquq müdafiəçisi Samirə Bayramova ictimai nəqliyyatlarda rus dilində yazıların yazılmasının qadağan edilməsi üçün petisiya başladıb. O, bu barədə öz şəxsi "Facebook" səhifəsində paylaşım edib.

Bayramova qeyd edib ki, Marneulidə, Bolnisidə, Axalkalakidə, Axaltsixedə, Telavidə və digər bölgələrdə fəaliyyət göstərən ictimai nəqliyyatda rus dilində yazılar qadağan edilməlidir.

Petisiyanı olduğu kimi sizə təqdim edirik.

"Rusca deyil!

Gürcüstan ərazisinin 20%-i Rusiya tərəfindən işğal olunub və işğal bu gün də davam edir. Bu gün Suxuminin süqutundan 30 il, Rusiya-Gürcüstan müharibəsindən 15 il ötsə də, biz hələ də düşmən dilində danışırıq, yazırıq, düşünürük. Xüsusilə regionlarda rus romantizminin hələ də mövcud olması qəbuledilməz və utancvericidir. Etnik azlıqlarla öz ana dilində ünsiyyət qurmaq, gürcü dilini təbliğ etmək, onların təhsilini təkmilləşdirmək əvəzinə yenə də düşmən dilində danışmaq məcburiyyətində qoyurlar. Marneulidə, Bolnisidə, Axalkalakidə, Axaltsixedə, Telavidə və digər bölgələrdə fəaliyyət göstərən ictimai nəqliyyatda rus dilində yazılar qadağan edilməlidir! Gürcüstanda yaşayan etnik azlıqların ünsiyyət dili işğalçı Rusiyanın dili olmamalıdır! Biz öz dilimizdə və dövlət dilində yaza, oxuya və danışa bilirik. Bizi Rusiyaya qaytarmayın! Biz də avropalıyıq, bizi də Avropaya inteqrasiya edin!"

Qeyd edək ki, ictimai nəqliyyatlarda hal-hazırda gürcü və rus dillərindən istifadə olunur.