Media Vəkilliyi Koalisiyası TV Pirvelidə məhkəmə prosesləri üçün müraciət sisteminin nasazlığı ilə bağlı yayılan məlumatlara münasibət bildirir və qeyd edir ki, “Gürcü Arzusu” hökuməti dövründə müstəqil və tənqidi media çətin şəraitdə işləməli olur.

Söhbət məhkəmənin saytında baş vermiş texniki xətadan gedir, nəticədə media nümayəndələri iclasları lentə almaq hüququ əldə etmək üçün ərizə yaza bilmirlər.
Dünən TV Pirvelinin informasiya xidmətinin rəhbəri Nodar Meladze Facebook sosial şəbəkəsində yazıb ki, sistem televiziyanın məhkəmə iclaslarının işıqlandırılması ilə bağlı müraciətlərini qəbul etmir, media nümayəndələri isə iclasa buraxılmır. Meladzenin sözlərinə görə, indiyədək ərizələrin qəbulu ilə bağlı heç bir izahat verilməyib və alternativ mexanizmlər təklif edilməyib.

“Demokratik cəmiyyətdə medianın rolu ölkədə mövcud olan aktual məsələlər, o cümlədən jurnalistlərin məhkəmə iclaslarında iştirakı və prosesin işıqlandırılması barədə ictimaiyyətin məlumatlandırılmasını nəzərdə tutur.
Məhkəmə iclaslarının işıqlandırılmasının qarşısının alınması media üçün əlavə problem yaradır. Buna uyğun olaraq ədliyyə orqanlarının məsul şəxslərinin dərhal mövcud nöqsanı aradan qaldırması, KİV nümayəndələrinin iclaslarda iştirakını təmin etmələri və problemlərin səbəblərini izah etmələri vacibdir”, - media koalisiyasından bildirilib.

Şəhər məhkəməsinin mətbuat xidmətindən verilən məlumata görə, texniki nasazlıq dünən, iyulun 22-də aradan qaldırılıb.