“Era Teatrı” “Aktyorluq, teatr və kino” kurslarına başlayır. İlk dəfə 2020-2022-ci illərdə təşkil edilən kurslar yenidən bərpa olunur. Bu barədə Tbilisi Azərbaycan Dövlət Dram teatrının keçmiş aktyor və rejissoru, “Era” teatrının bədii rəhbəri Anar Rafiqoğlu “Marneuli” radiosu ilə söhbəti zamanı məlumat verdi. Onun sözlərinə görə, əvvəlki illərdə kurslara 50-yə yaxın gənc qatılıb və həmin vaxtlarda kursları uğurla tamamlayan gənclər bəziləri hal-hazırda teatrın rəsmi üzvləridir və tamaşalarda yer alırlar. Anar Rafiqoğlunun dediyinə görə, kursların əsas hədəfi cəmiyyətdə incəsənət sahəsinə marağın artırılmasıdır.

“Biz istəyirik ki, gənclərimiz vaxtlarını telefonda və ya kompüterdə oyunlar oynamaq, qəlyanxanalarda keçirmək əvəzinə teatrlara, kinoteatrlara, sərgilərə, mədəniyyət muzeylərinə üz tutsunlar. Ölkəmizin, millətimizin mədəni dəyərlərini, incəsənət xadimlərini tanısınlar. Əlbəttə, bizim peşəkar aktyor yetişdirmək kimi böyük bir iddiamız yoxdur. Peşəkar aktyor olmaq istəyənlər, məsləhətdir ki, gedib ən azı 4 il bu sahədə ali təhsil alsınlar. Bizim məqsədimiz başlanğıc mərhələsində həvəs və istedadı olan gənclərlə təcrübələrimizi paylaşmaq, onların inkişafına kiçik bir töhfə verməkdir”, – Anar Rafiqoğlu bildirdi.

“Era” teatrının bədii rəhbərinin dediyinə görə, “Era Teatrı”nın təşkil etdiyi “Aktyorluq, teatr və kino” kursları sentyabr ayında başlayacaq və üç ay davam edəcək. Kurslara teatrın bədii rəhbəri Anar Rafiqoğlu və bədii rəhbərin müavini Elnur Vəlizadə rəhbərlik edəcəklər.

“Eyni zamanda bir çox təcrübəli mədəniyyət, ədəbiyyat və incəsənət nümayəndələri də kurslara cəlb olunacaq və iştirakçılara mühazirələr keçəcəklər. Üç aylıq kursun sonunda kursu uğurla tamamlayan gənclərə iki dildə: gürcü və ingilis dillərində sertifikat veriləcək. Daha ətraflı məlumat və kurslara qeydiyyat üçün teatrın rəsmi elektron poçt ünvanına – CLOAKING adresinə müraciət edə bilərsiniz”.

Anar Rafiqoğlu onu da bildirdi ki, kursda öz bacarığı ilə fərqlənən tələbələr “Era Teatrı”nın kino və tamaşalarında yer alacaqlar.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---