Hər ayın əvvəlində bankların qarşısında sıxlıq olur. Kimisi pensiya, kimisi sosial yardımını almağa çalışır. Bu müddət ərzində bankların qarşısında yaşlı qadın və kişiləri görmək olur. Onlar pensiya almaq üçün uzun məsafə qət edərək kəndlərdən rayon mərkəzinə üz tuturlar. Bəzən yaşlı şəxslər bankların qarşısında pensiyasını almaq üçün saatlarla öz növbələrini gözləyirlər.

Marneuli küçələrində əhali arasında sorğu keçirdik. Onlardan aldıqları pensiyaları nəyə xərclədiklərini və kifayət edib-etmədiyini soruşduq. İştirak edənlərin əksəriyyəti aldıqları pensiyanın miqdarının az olduğunu və onların gündəlik ehtiyaclarını qarşılamaları üçün kifayət etmədiyini bildirdilər.

“Nəyə xərcləyəcəyik? Həkimə, iynəyə, dərmana. Şəkər var, şəkərə. Təzyiqə, ayaq üstə dura bilmirəm, yıxılıram. Deyirəm, gedim görüm hələ verəcəklərmi, bir az çəkmişik, az alırıq. Həkimə getdim, görmür pulum. İynəyə, dərmana, sistemə verirəm”, – sorğu iştirakçısı dedi.

İştirakçıların sözlərinə görə, hər şey bahalaşdığından aldıqları pensiya onlara kifayət etmir.

“Pensiyayı alıram, onu da həkimlərə verirəm. Ayrı bir peşəm yoxdur. Heç boğazımı görmür. Yetmir, birbaşa yetmir. Dərman elə adicə, 1 dənə tabletka 10-20 manatdır. 1 dənə tabletkaya 10 manat verirəm. Dərmandan başqa heç nəyə xərcləmirəm. İşıqdır, ayda-ildə bir dəfə işığa verə bilirəm”.

Xatırladaq ki, Gürcüstanda pensiyalar bu ilin yanvar ayının birindən artırılıb. 70 və daha yuxarı yaşda olan şəxslərin pensiyası 50 lari artırılaraq 415 lari müəyyən edilib. Yüksək dağlıq yaşayış məntəqələrində yaşayan şəxslərin pensiyasının məbləği 500 lari müəyyən edilib. Bundan əlavə, yaşı 70-dən az olan şəxslərin pensiyası 20 lari artaraq 315 lari, yüksək dağlıq qəsəbələrdə yaşayanlar üçün isə 378 lari təşkil edib.

Bununla yanaşı, pensiya alanların çoxu – 254 000 nəfəri Tbilisidə, 132 000 nəfəri İmeretidə, 88 000 nəfəri Sameqrelo-Zemo Svanetidə və 83 000 nəfəri Kvemo Kartlidə qeydiyyatdadır. 2012-ci ildən 2023-cü ilə qədər olan statistikaya nəzər salsaq, pensiyaçıların sayında hər il artım müşahidə olunduğunu görə bilərik.

İstifadə olunan əsas şəkil "Marneuli" radiosunun arxivindən götürülüb.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---