Marneuli bələdiyyəsinin uşaq bağçaları bu gün, 19 sentyabr tarixində 4 saat tez bağlanacaq.
Marneulinin müxtəlif bağçalarından valideynlər “Marneuli” radiosuna bildiriblər ki, bağça müəllimləri və rəhbərləri uşaqları bağçadan tez aparmağı xahiş ediblər.
Valideynlərə dəqiq səbəbi heç kim açıqlamayıb, bəzilərinə deyiblər ki, bağçalarda saat 2-dən sonra su kəsiləcək, bəzilərinə isə təlimə getdiklərini söyləyiblər.

“Məsələn, mən dünən soruşanda

ki, bağça niyə olmayacaq, dedilər ki, saat 2-dən sonra su olmayacaq və uşaqların bağçada qalmasının mənası yoxdur”, – kimliyinin bilinməsini istəməyən valideyn bildirir.

“Sosial şəbəkədə uşaqların çatı var, yazıblar ki, saat 2-dən sonra aparın”, – daha bir kimliyinin açıqlanmasını istəməyən valideyn bildirir.

“Bilmirəm, nə baş verir, dedilər, təlimlər var ona görə uşaqları tez aparın” – ad və soyadını qeyd etmədiyimiz daha bir valideyn bildirir.
(Marneuli bağçalarının birinin çatında yazışma).


Bağçalardan uşaqların buraxılmasının Gürcü Arzusunun bu gün Rustavidə keçiriləcək seçkiqabağı görüşü ilə əlaqədar olub-olmaması ilə bağlı suala Marneuli Uşaq Bağçaları Birliyinin rəhbəri cavab vermədi. Telefonda məsələni dedikdən sonra görüşdə olduğunu bildirdi və telefonu söndürdü.

Marneuli nəqliyyat şirkəti “Ekspressturist”in rəhbəri ilə məlumatı dəqiqləşdirmək istədik. Şirkətin nəqliyyat vasitələri əksər hallarda hakimiyyətin planlaşdırdığı aksiyalara sərnişin aparır.

Yuri Samxaradze zəngimizdə telefonu söndürdü, sonra özü zəng vurdu. Bizdə elə təəssürat yarandı ki, bu dəfə mətn hazırlamışdı. O, təsdiq etdi ki, "Gürcü Arzusu"nun planlaşdırdığı aksiyaya onun nəqliyyat vasitələri sürücülərin öz istəyi ilə gedəcəklər. Ancaq o, bizi əmin etdi ki, bu böyük miqdar deyil və Marneulidə qalan əhalinin hərəkət etməsinə maneəçilik yaranmayacaq.

“Çox deyil, sürücülərin özləri xahiş etdilər ki, onlar (xalq) icarə edib. Sürücülər xahiş etdilər və maneçilik yaranmayacaq. Öz vəsaitləri ilə gedirlər (əhali)”, – Yuri Samxaradze bildirir.

“Gürcü Arzusunun seçki kampaniyası çərçivəsində regional tədbirlər Kvemo Kartlidə bu dəfə Rustavi bələdiyyəsində keçiriləcək.

Görüşdə hakim partiyanın liderləri çıxış edəcəklər, tədbir saat 20:00-da başlayacaq.