“TV Pirveli”-nin araşdırma qrupu tərəfindən seçkilərin saxtalaşdırılması ilə bağlı hazırlanmış materialda Marneulidə seçkilərin saxtalaşdırılmasından da söhbət açılıb. Maia Naveriani, Mirzə Darğallı, Tural Mustafayev – bu “Nodar Meladzenin Şənbəsi”-ndə yayımlanan araşdırma materialında yer alan şəxslərin kiçik siyahısıdır.

Materialda Marneuli meriyasının Maliyyə-büdcə Xidmətinin keçmiş rəhbəri Maia Naveriani də yer alıb. Naveriani indi də Marneuli meriyasında işləyir.

O, seçkilərdə Marneulinin 4 saylı seçki məntəqəsində qeydiyyatçı olaraq fəaliyyət göstərirdi. Araşdırma materialından görünür ki, məhz qeydiyyatçılar seçkilərin saxtalaşdırılmasının əsas bəndini təşkil edirdilər.

Məntəqədə çəkilmiş videolardan görünür ki, vətəndaşlar başqa şəxslərin pasportları və şəxsiyyət vəsiqələri ilə Maia Naverianinin yanına gedərək səs verməyə cəhd göstərirlər. Müşahidəçilər və media nümayəndələri başqasının şəxsiyyət vəsiqəsi ilə səs verməyə, seçkidə iştirak etməyə cəhd göstərən bir neçə vətəndaşa mane olublar.

“TV Pirveli”-nin araşdırmaçı jurnalistləri Maia Naverianidən də müsahibə almağa çalışıblar, amma o, kadrlardan gizlənib – Naverianinin həyat yoldaşı isə jurnalistləri öldürməklə hədələyib.

Araşdırma materialında daha bir qeydiyyatçı, Tural Mustafayevdən söhbət açılıb. O, Əzizkənd ictimai məktəb direktorunun müavinidir. Jurnalistlər ittihama cavab almaq üçün Mustafayevin evinə gediblər, Mustafayevin atası isə 32 yaşlı oğluna jurnalistlərlə söhbət etməyə icazə verməyib.

Seçkilər günü Parlamentin Marneuli və Qardabani seçki dairəsindən majoritar deputatı, “Gürcü Arzusu”-nun üzvü Zaur Darğallının qardaşı Mirzə Darğallının pasportu ilə yad şəxs səs verməyə cəhd edirmiş. Müşahidəçilər vətəndaşa Mirzə Darğallının pasportu ilə səs verməyə imkan verməyiblər. Araşdırma materialında vətəndaşların başqa adamın şəxsiyyət vəsiqəsi və pasportu ilə səs verməyə cəhd göstərdiyi, Mirzə Darğallı ilə bağlı, eləcə də digər hallardan söhbət açılır.

Marneuli bələdiyyəsinin Keşəli kəndində yaşayan qadının şəxsiyyət vəsiqəsi ilə də başqa adam səs verməyə cəhd göstərirmiş.

Televiziya süjetdə səslərin saxtalaşdırılması sxemini təsvir edərkən seçki prosesinə gizli çağrı mərkəzləri və “kapitan”-ların cəlb olunmasından bəhs edib. “Nodar Meladzenin Şənbəsi”-ndə yayımlanan məlumata görə, bütün seçki məntəqələri yaxınlığında “Gürcü arzusu”-nu dəstəkləyən və ya partiya tərəfindən qorxudulan seçicilərin fəaliyyətini izləyən çağrı mərkəzi yerləşirmiş. Çağrı mərkəzlərinin koordinatorlarını isə kapitan adlandırırlarmış.

26 oktyabr tarixində Gürcüstanda Parlament seçkiləri keçirilib. Vətəndaş sektoru və müxalifət seçkiləri tanımır – onlar seçkilərin Beynəlxalq Seçki Komissiyasının nəzarəti altında yenidən keçirilməsini tələb edirlər.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin!