İran Futbol Federasiyasının İntizam Komitəsi Premyer Liqanın 7-ci turunda Tehranın "Azadi" stadionunda baş tutan "Persepolis" - "Traktor" qarşılaşmasında baş verən hadisələrlə bağlı qərarını elan edib. Qərara əsasən, hər iki klub azarkeşsiz oyun keçirmək və pul cəriməsi ödəmək cəzasına məhkum olunub.

İRNA xəbər agentliyinin yaydığı rəsmi qərara görə, azarkeşlərin törətdiyi qayda pozuntularına görə federasiya bir sıra tədbirləri tətbiq edib.

İntizam Komitəsinin qərarına əsasən, "Persepolis" və "Traktor" arasında gələcək iki mövsümdə keçiriləcək ev və səfər oyunları azarkeşsiz olacaq. Əgər bu iki komanda kubok və ya Superkubokda üz-üzə gəlsə, stadionun tamaşaçı tutumu 50 faiz azaldılacaq. "Persepolis" iki ev oyununu yalnız qadın azarkeşlərin iştirakı ilə və 50 faiz doluluq səviyyəsində keçirəcək. Bu cəzanın biri şərti saxlanılıb. Bundan əlavə, "Persepolis" klubuna 2 milyard, "Traktor"a isə 1 milyard tümən cərimə tətbiq olunub. "Persepolis" iki ay ərzində azarkeşlər klubu yaratmağa məcbur edilib, əks halda, mövsümün sonuna qədər ev oyunlarını azarkeşsiz keçirəcək.

Qərardan sonra "Traktor" klubu bəyanat yayıb və İntizam Komitəsinin qərarına etirazını bildirib. Klub bəyan edib ki, federasiyanın irqçi şüarlarla bağlı hüquqi yanaşmasında bəzi dəyişikliklər olsa da, əvvəlki təcrübələr və oxşar qayda pozuntularının təkrarlanması fonunda verilən cəzalar yetərli deyil.

"Traktor" bəyanatında vurğulayıb ki, "Azadi" stadionunda etnik təhqirlər 2011-ci illərdən bəri davam edir və İntizam Komitəsi bu qayda pozuntularının qarşısını almaq üçün effektiv tədbirlər görməyib. Klub həmçinin İntizam Komitəsinin bu işə yanaşmasını tənqid edib və tətbiq edilən cəzaların yetərli olmadığını bildirib.

Bəyanatın digər hissəsində "Traktor" oyunun hakim və nəzarətçilərinin fəaliyyətini tənqid edib və onların stadiondakı qayda pozuntularının qarşısını almaqda yetərli tədbirlər görmədiyini bildirib. Klub həmçinin "Persepolis"in oyun zamanı xəsarət alan azarkeşlərin sayı ilə bağlı iddiasını rədd edib və bildirib ki, yaralıların əksəriyyəti "Traktor" tərəfdarları olub.

"Traktor" qərardan apellyasiya şikayəti verərək, işin yenidən araşdırılması üçün İntizam Komitəsinə müraciət edib. Klub hesab edir ki, mövcud qərar oxşar qayda pozuntularının qarşısını almaq üçün yetərli deyil və stadionlarda etnik təhqirlərə qarşı daha sərt tədbirlər görülməlidir.

Bundan əvvəl "Traktor" klubu bəyanatında Tehranda Perspolisə qarşı keçirilən oyunda baş verən hadisələrə və stadionda səsləndirilən irqçi şüarlara etiraz etmişdi. Klub İran Futbol Federasiyasının İntizam Komitəsi ciddi tədbir görmədiyi təqdirdə FIFA-ya şikayət edəcəyini bildirmişdi.

Traktorun oyunlarında və bəzi digər komandalarla qarşılaşmalarda türklərə qarşı irqçi şüarlar səsləndirilməsi yeni hal deyil, bu, dəfələrlə baş verib. Lakin bu cür davranışların qarşısını almaq üçün ciddi addım atılmayıb.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---