"Vahid Milli Hərəkat" (VMH) partiyasının məlumatına görə, partiyanın liderlərindən biri, 2004–2012-ci illərdə Acarıstan Muxtar Respublikasının hökumət başçısı olmuş və eks-prezident Mixeil Saakaşvilinin silahdaşı sayılan Levan Varşalomidze Qazaxıstanda saxlanılıb.
Partiyanın məlumatına əsasən, saxlanma Rusiya Federasiyasının tələbi ilə baş verib.

Bu xəbəri jurnalistlərə VMH-nin digər lideri Levan Bejashvili təqdim edib.

Bejashvilinin sözlərinə görə, Varşalomidze Qazaxıstanın hava limanında, sərhədi keçərkən saxlanılıb.

"Əldə olan ilkin məlumata görə, məsələ Rusiya Federasiyasından göndərilən cinayət işi ilə bağlıdır. Bu iş Levan Varşalomidzenin Ukrayna hakimiyyəti ilə həyata keçirdiyi siyasi məsləhətçilik fəaliyyətinə aiddir", – deyə Bejashvili bildirib.

Onun sözlərinə görə, Varşalomidzenin Rusiyaya ekstradisiyası təhlükəsi var.

"Buna görə də hazırda bütün resurslarımızı səfərbər etmişik ki, Ukrayna və Qazaxıstan hakimiyyət orqanları ilə düzgün ünsiyyət quraq. Məqsədimiz odur ki, Qazaxıstan hakimiyyəti Gürcüstan və Qazaxıstanın maraqlarına uyğun qərar qəbul etsin", – deyə Bejashvili vurğulayıb.

O, Rusiyanın qaldırdığı cinayət işinin heç bir hüquqi əsası olmadığını bildirib.

"Bu işin hansı məqsədlə açıldığını başa düşmək çətin deyil. Buna görə də düzgün kommunikasiyaya ehtiyac var ki, Levan Varşalomidzeni qanunsuz saxlanmadan xilas edək", – deyə o əlavə edib.

Hadisənin digər detalları hələlik məlum deyil.

Levan Varşalomidze VMH hakimiyyətdə olduğu dövrdə – 2004–2012-ci illərdə Acarıstan Muxtar Respublikasının hökumət başçısı olub. O, eks-prezident Mixeil Saakaşvilinin yaxın dostu və siyasi müttəfiqidir.

Varşalomidze 2020-ci ildə seçilmiş Gürcüstan parlamentinin üzvü olub, lakin 2021-ci ilin fevralında etiraz əlaməti olaraq deputat statusundan imtina edib. Daha sonra 2022-ci ildə parlament iclaslarına qatılmadığı üçün mandatı ləğv edilib.

O, 2020-ci ildə "Vahid Milli Hərəkat" partiyasının sədri olmaq uğrunda daxili seçkidə Nika Meliaya məğlub olub.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---