Bakı-Tbilisi-Bakı dəmir yolu reysləri ilə bağlı qərar hələ qəbul edilməyib.

Bu barədə Azərbaycan Dəmir Yollarının sərnişin daşınması departamentinin rəhbəri Azər Fərəcov açıqlama verib, bunu isə "Trend" agentliyi yayımlayıb.

"Reyslərin açılması ilə bağlı məlumatımız yoxdur. Gürcüstan tərəfi bununla bağlı açıqlama verib və bu barədə məlumatları biz də gözləyirik," - deyə Fərəcov bildirib. "Trend" xatırladır ki, Tbilisi-Bakı istiqamətində dəmir yolu reyslərinin bərpası ilə bağlı açıqlama Gürcüstanın baş naziri İrakli Kobaxidze tərəfindən Dubayda etdiyi səfərdə verilmişdi. Onun sözlərinə görə, Gürcüstan bu məsələyə dair Azərbaycanla danışıqlar aparır.

Həmçinin, fevralın ortalarında Azərbaycan mətbuatı bir neçə mənbəyə istinadən yazırdı ki, Bakı-Tbilisi-Bakı istiqamətində sərnişin qatarlarının hərəkəti aprel ayında bərpa oluna bilər. Mənbənin məlumatına görə, bu məsələyə dair Azərbaycan və Gürcüstanın müvafiq qurumları arasında razılaşma artıq əldə olunub.

O zaman "1news.az"a Azərbaycan Dəmir Yolları mətbuat xidmətindən bildirildi ki, "karantin rejimi səbəbindən ölkənin quru sərhədləri bağlanıb və quru yolu ilə beynəlxalq sərnişin daşımaları dayandırılıb. Bu səbəbdən dəmir yolu ilə beynəlxalq sərnişin daşımaları həyata keçirilmir."

Bununla belə, qurum əlavə edib ki, hökumətlər arasında razılaşma əldə edildikdə Azərbaycan Dəmir Yolları sərnişin daşımalarının bərpası üçün hazırlıq işlərinə başlamağa hazırdır.