"Gürcü Arzusu" partiyasının yaratdığı müvəqqəti istintaq komissiyasına gəlmədiyi üçün “Dəyişiklik üçün” koalisiyasının liderlərindən biri olan Nika Qvaramiaya Tbilisi Şəhər Məhkəməsi tərəfindən 30 min lari girov şəklində qətimkan tədbiri seçildi.

Hakim Eka Barbakadze prokurorluğun vəsatətini tam şəkildə təmin edib.

Nika Qvaramia mübahisəli parlamentin müvəqqəti istintaq komissiyasına çağırılmışdı, lakin gəlməkdən imtina etdi. Komissiya ondan 2004–2012-ci illərdə Gürcüstanda müdafiə, təhlükəsizlik və insan hüquqlarının müdafiəsi sahəsindəki vəziyyətlə bağlı izahat verməsini tələb edirdi.

Cinayət işi Gürcüstan Cinayət Məcəlləsinin 349-cu maddəsi – "Gürcüstan Parlamentinin müvəqqəti istintaq komissiyasının qanuni tələbini yerinə yetirməmək" – üzrə açılıb. Bu maddə cərimə, azadlıqdan bir ilədək məhrumetmə və ya üç ilədək vəzifə və ya fəaliyyət hüququndan məhrum etmə ilə cəzalandırıla bilər.

Nika Qvaramia məhkəmə iclasına "popkornla" gəlmişdi. Hakim onu qaydalara əməl etməyə çağırıb, Qvaramia isə cavabında bildirib ki, “onun şəkəri var və yeməyə məcburdur”. Bunun ardınca hakim fasilə elan edib.

Fasilədən sonra məhkəmə prokurorluğun vəsatətini dinləyib. Prokurorluq onun gizlənmə və təkrar cinayət törətmə riskinin olduğunu bildirib. Qvaramia çıxışında “ittihamın absurdluluğundan” və “komissiyanın qeyri-legitimliyindən” danışıb.

O qeyd edib ki, girovu ödəmək barədə qərarı komanda ilə məsləhətləşmədən sonra verəcək.

“Gürcü Arzusu” 5 fevral tarixində “Vahid Milli Hərəkat” dövrünü araşdırmaq üçün istintaq komissiyası yaradıb. Komissiyanın sədri həmin partiyanın liderlərindən biri – Tea Tsulukianidir.

Komissiya iclaslara müxalif liderləri çağırır – həm “Milli Hərəkat”ın keçmiş yüksək vəzifəli şəxslərini, həm də digər müxalifətçiləri. İclaslara gəlmədikləri üçün artıq bir sıra siyasətçilərə ittiham irəli sürülüb və girov qətimkan tədbiri seçilib: Mamuka Xazaradze və Badri Caparidze (hər birinə 50 000 lari), İrakli Okruaşvili (20 000 lari), Qivi Tarqamadze (10 000 lari) və Zura Caparidze (20 000 lari).

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---