"Gürcü Arzusu" hökumətinin baş naziri İrakli Kobaxidze Tbilisi meri Kaxa Kaladze haqqında danışarkən bildirib ki, onun qarşıdakı dörd il üçün ambisiyalı planları var.

Baxmayaraq ki, "Gürcü Arzusu" hələlik 4 oktyabrda keçiriləcək yerli özünüidarəetmə seçkiləri üçün rəsmi mer namizədlərini açıqlamayıb, Kobaxidzenin bu bəyanatı ehtimal yaradır ki, Tbilisinin hazırkı meri növbəti dəfə namizəd ola bilər.

“Kaxa Kaladzenin qarşıdakı dörd il üçün ambisiyalı planları var. Paytaxtımızın inkişafı üçün çox dəqiq bir plan hazırlanır və əminəm ki, dörd ildən sonra şəhərimiz daha da inkişaf etmiş olacaq və bu cür layihələrin sayı artacaq. Əgər Tbilisini səkkiz il əvvəlki vəziyyəti ilə müqayisə etsək, bu gün şəhərimiz tamamilə fərqlidir – daha inkişaf etmiş, daha yaşıl, daha gözəldir və bütün bunlar ilk növbədə şəhər merinin xidmətidir. Bir daha ona xüsusi təşəkkürümü bildirmək istəyirəm”, – deyə İrakli Kobaxidze bu gün, 21 may tarixində, Tbilisidə Universitet və Kavaxaradze küçələrini birləşdirən tunelin açılış mərasimində çıxışı zamanı bildirib.

Bundan əvvəl, apreldə, İrakli Kobaxidze "Rustavi 2" telekanalına müsahibəsində demişdi ki, mer namizədi ilə bağlı "siyasi şura toplanmayıb" və "ona görə də mənim nəyisə 100% təsdiqləmək səlahiyyətim yoxdur. Amma o, təcrübəsi, reytinqi və gördüyü işlərlə doğrudan da alternativsizdir".

Yerli özünüidarəetmə seçkiləri 2025-ci il oktyabrın 4-də keçiriləcək.

Avropayönlü partiyaların əksəriyyəti bu seçkilərə qatılmağı qeyri-mümkün hesab etdiklərini bildirirlər. "Gürcü Arzusu" isə bütün 64 bələdiyyədə qalib gəlməyi planlaşdırır.
Kaxa Kaladze Tbilisi meri postuna ikinci müddət üçün 2021-ci ildə seçilib.