Artıq iki həftəyə yaxındır ki, “Gürcü Arzusu”nun hökumətində daxili işlər naziri vəzifəsini Qela Qeladze tutur.

O, 2025-ci il 26 fevral tarixində təqdim etdiyi əmlak bəyannaməsində göstərib ki, evlidir və iki övladı var.

Bəyannaməyə əsasən, ailənin daşınmaz əmlakının böyük hissəsi həyat yoldaşı Natia Elizbaraşvilinin adına qeydiyyatdan keçib. Onlardan ən sonuncusu – Tbilisinin mərkəzində, Kazbeqi prospektində yerləşən otel otağıdır. Alqı-satqı dəyəri 150 000 ABŞ dolları təşkil edib. Qeladzenin öz adına isə Tbilisidə yaşayış evi və Axmeta bələdiyyəsində torpaq sahəsi qeyd olunub.

Cütlüyün adına həmçinin bahalı avtomobillər də var. Qeladze 2013-cü ildə 70 000 dollara Toyota L200, Natia Elizbaraşvili isə 2019-cu ildə 105 000 avroya “Mercedes” alıb.

Bəyannaməyə görə, Qeladzenin həyat yoldaşı otel otağının alınması üçün lazım olan 150 000 dolları valideynlərindən hədiyyə olaraq alıb.

Bununla belə, Qela Qeladzeden fərqli olaraq, bəyannamədə Natia Elizbaraşvilinin hər hansı iş yeri göstərilməyib. Lakin onun bank hesablarında 100 000 ABŞ dolları və müxtəlif valyutalarda əlavə bir neçə min dollar olduğu qeyd olunur.

Qela Qeladzenin siyasi və idarəçilik karyerası – “Gürcü Arzusu” dönəmində
Nazir vəzifəsinə təyin olunmazdan əvvəl Qeladze Dövlət Təhlükəsizliyi Xidmətinin rəis müavini, daha əvvəl isə Müdafiə və Təhsil Nazirliklərində nazir müavini vəzifələrini tutub.

Onun bioqrafiyasına əsasən:

2023–2024-cü illərdə – Təhsil, Elm və Gənclər Nazirinin müavini idi;

Ondan əvvəl beş il həmin nazirliyin mandatur xidmətinə rəhbərlik edib.

2021-ci il 19 may tarixində o, mandatur xidmətinin rəhbəri kimi Tbilisinin 51 saylı məktəbində dərsə qatılıb. Kadrlar yayılarkən lövhədə rus dilində yazı görünür: Жизнь ворам – “Oğrulara həyat”.

2016–2018-ci illərdə – DİN-in Mərkəzi Kriminal Polis Departamentində idarə rəisi olub;

2012–2016-cı illərdə – Probasiya üzrə Milli Agentliyin rəis müavini olub.

Qeladzenin karyerası “Vahid Milli Hərəkat” dövründə
Qeladze siyasi fəaliyyətinə daha əvvəl – Vahid Milli Hərəkat hakimiyyəti dövründə başlayıb. 2010–2012-ci illərdə Dimitri Şaşkinin rəhbərliyi ilə Təhsil Nazirliyində mandatur xidmətinin rəhbər müavini olub. Həmçinin müxtəlif strukturlarda müxtəlif vəzifələr tutub, o cümlədən SOD-da (Xüsusi Operativ Departament):

2007–2008-ci illərdə – Ədliyyə Nazirliyinin Baş Müfəttişliyinin müşaviri;

2007-ci ildə – Ədliyyə Nazirliyinin Probasiya Departamentində müşavir;

2005–2006-cı illərdə – DİN-in Kriminal Polis Departamentində şöbə müdirinin müavini;

2005-ci ildə – Tbilisi Polisi Vake-Saburtalo İdarəsində müfəttiş;

2004–2005-ci illərdə – DİN-in SOD idarəsində xüsusi əhəmiyyətli işlər üzrə baş müstəntiq;

2004-cü ildə – DİN-in Didube-Çuğureti İstintaq Xidmətində müstəntiq;

2004-cü ildə – Dövlət Mühafizə Xidmətinin baş müfəttişliyində müşavir.