“Georgian Airways” tərəfindən yayılan rəsmi məlumata əsasən, 16 və 17 iyun tarixlərində Tbilisi–Təl-Əviv–Tbilisi istiqamətində nəzərdə tutulan uçuşlar təhlükəsizlik səbəblərinə görə ləğv olunub.

Şirkətin məlumatında qeyd olunur ki, artıq bu reyslərə bilet almış sərnişinlərə biletlərini dəyişmək və ya ödənilən məbləği geri almaq imkanı təqdim olunur. Bu prosedurlar biletin alındığı yerdə həyata keçirilə bilər.

“Georgian Airways” onu da bildirir ki, Təl-Əviv istisna olmaqla, digər istiqamətlər üzrə planlaşdırılan bütün reyslər qrafikə uyğun olaraq fasiləsiz davam etdirilir.

Təhlükəsizlik tədbirlərinin gücləndirilməsi İsrail və İran arasında artan gərginlik fonunda həyata keçirilir.

Xatırladaq ki, İran tərəfindən İsrailə qarşı həyata keçirilən hava hücumları nəticəsində ölənlərin sayı artıq 10 nəfərə çatıb. İsrail isə cümə günü, sübh saatlarında İranda yerləşən hərbi obyektlərə genişmiqyaslı hava zərbələri endirib.

İranın dövlət mediasının məlumatına görə, hücum nəticəsində İslam İnqilabı Keşikçiləri Korpusunun (SEPAH) komandanı Hüseyn Salami, bir neçə yüksək rütbəli hərbi vəzifəli şəxs və nüvə üzrə ixtisaslaşmış elm adamı həlak olub.

İsrail Müdafiə Qüvvələrinin (IDF) açıqlamasına əsasən, İran cümə günü səhər saatlarında İsrail istiqamətinə təxminən 100 pilotsuz uçuş aparatı (PUA) göndərib, lakin onların hamısı İsrail qüvvələri tərəfindən zərərsizləşdirilib.

Hücumların əsas hədəflərindən biri İranın əsas uran zənginləşdirmə obyekti olub.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---