Siyasətçi, “Droa” partiyasının təsisçisi və “Dəyişikliklər naminə Koalisiyası”nın liderlərindən biri olan Elene Xoştaria,

"Facebook" paylaşımına görə Tbilisi Şəhər Məhkəməsi tərəfindən 4000 lari məbləğində cərimələnib. Söhbət onun “Gürcü Arzusu” partiyasının liderlərindən biri – Mamuka Mdinaradzeyə ünvanladığı paylaşımından gedir.

Xoştariyaya qarşı “Gürcüstan dövlətinin siyasi vəzifəli şəxsinə təhqir” maddəsi ilə inzibati iş açılmışdı.

Siyasətçiyə təkcə cərimə deyil, həm də 3 il müddətinə silah gəzdirmə hüququnun məhdudlaşdırılması qərarı verilib.

Qərar bu gün səhər saatlarında Tbilisi Şəhər Məhkəməsinin hakimi David Tetrauli tərəfindən elan edilib. Elene Xoştaria məhkəmə proseslərinin heç birinə qatılmayıb.

“Elene Xoştaria hüquq pozucusu kimi tanınsın... və ona 4000 lari məbləğində inzibati cərimə təyin edilsin... Elene Xoştariadan 3 il müddətinə silah gəzdirmə hüququ alınsın,” – deyə hakim Tetrauli bəyan edib.

Hakimin sözlərinə görə, Xoştaria bu cəriməni ona qərarın təqdim olunmasından etibarən 7 gün ərzində ödəməlidir. Bu gün yalnız qərar elan olunub – məhkəmə prosesi isə 16 iyunda keçirilib. Əvvəlki iclasda Daxili İşlər Nazirliyinin nümayəndəsi Andro Qurula bildirib ki, Xoştariyanın Facebook səhifəsi polis tərəfindən “konkret bir şikayət çərçivəsində” yoxlanılıb. Şikayəti Mamuka Mdinaradze təqdim etmişdi.

“Məlum oldu ki, Elene Xoştaria Mamuka Mdinaradzeyi sözlü təhqir etmişdi,” – deyə məhkəmə iclasının təxirindən sonra jurnalistlərə DİN nümayəndəsi bildirib.

Gürcüstanda ictimai fiqurlar haqqında sosial şəbəkələrdə yayımlanan statuslara görə inzibati məsuliyyətə cəlbetmə yeni bir təcrübədir.

Eyni inzibati pozuntu ilə bağlı keçən həftə 20-dən çox jurnalist, siyasətçi və fəal məhkəməyə çağırılıb.

Onların hamısı müxtəlif məbləğlərdə cərimələnib.

Jurnalistlərə, fəallara və siyasətçilərə Facebook statuslarına görə 1500 laridən 4000 lariyə qədər cərimə və ya 45 günədək inzibati həbs təhlükəsi var.

Bu cür inzibati cəza tədbirləri “Gürcü Arzusu” partiyası tərəfindən Avropayönümlü etiraz aksiyaları fonunda sərtləşdirilmiş qanun dəyişikliyinə əsasən tətbiq olunur.