"Sosial Ədalət Mərkəzi" bildirir ki, digər QHT-lər kimi, Antikorrupsiya Bürosu onlardan da qrantlarla bağlı ətraflı məlumat tələb edib.

Təşkilatın Direktorlar Şurasının üzvü Tamta Mikeladze bildirir ki, məhkəmə qərarı əsasında Büro "bütün növ məlumatları tələb edir və yoxlamanın məqsədinə uyğun sərhədlər və çərçivələr müəyyən etmir":

“Tələb 2024-cü il yanvarın 1-dən 2025-ci il iyunun 10-dək təşkilatın fəaliyyətinə dair tam hüquqi, texniki və maliyyə məlumatlarını, ən önəmlisi isə hüquq müdafiəsi və hüquqi yardım çərçivəsində benefisiarlarımız üçün göstərilmiş dəstəyə dair bütün məlumatları əhatə edir,” – deyə Tamta Mikeladze "Facebook" sosial şəbəkəsində yazıb.

Onun sözlərinə görə, təşkilat geri çəkilmək niyyətində deyil və ifadə azadlığını qorumaq üçün bütün imkanlardan istifadə edəcək:

“Bizim üçün aydındır ki, Antikorrupsiya Bürosunun hüquqi araşdırma prosesi qanuni əsasdan məhrumdur və müstəqil təşkilatın fəaliyyətinə kobud müdaxilə cəhdidir. Məqsəd bizi iflic vəziyyətinə salmaq və susdurmaqdır.”

İyunun 18-də məlum oldu ki, qrantlarla bağlı ətraflı məlumat almaq üçün məhkəmə qərarı beş müxtəlif təşkilata göndərilib. Bu təşkilatların fəaliyyət sahələri və ixtisaslaşmaları bir-birindən tamamilə fərqlidir:

• "Beynəlxalq Şəffaflıq – Gürcüstan" – seçkilərin monitorinqi və korrupsiya əleyhinə/demokratiya mövzularında çalışan təşkilat. İcraçı direktoru Eka Qiqauridir;
• "Sapari" – qadın hüquqları və ehtiyacları sahəsində çalışan fond. Direktoru Baia Pataraia;
• "Vətəndaş Cəmiyyəti Fondu" – keçmiş “Açıq Cəmiyyət Fondu”, 2024-cü ildən Soros Fondunun qlobal şəbəkəsindəki dəyişikliklərdən sonra müstəqil fəaliyyət göstərir. Direktoru Keti Xutsişvilidir;
• "İqtisadi Siyasət Araşdırma Mərkəzi" (EPRC) – araşdırma və analitik mərkəz, tədqiqatçılar və keçmiş diplomatları bir araya gətirir. Tbilisidə keçirilən beynəlxalq konfransın təşkilatçısıdır. 2018-ci ilə qədər bu konfransa "Gürcü Arzusu"nun yüksək vəzifəli şəxsləri də qatılırdılar. İcraçı direktoru Nino Evqenidzedir;
• "Gürcüstanın Gələcəyi Akademiyası" – 2015-ci ildə yaradılmış gənclərlə çalışan təşkilat. Hal-hazırda “Feniks Ordeni” adlı mühazirə silsiləsi keçirir. İcraçı direktoru Mari Kapanadze, keçmiş direktoru isə "Franklin Klubunun" həmtəsisçisi Aleksandre Zibzibadzedir.

Antikorrupsiya Bürosu QHT-lərdən nə tələb edir?
Büro QHT-lərdən 2024-cü il yanvarın 1-dən etibarən bağladıqları bütün müqavilələrin – o cümlədən qrant müqavilələrinin – surətini təqdim etmələrini istəyir. Bu müqavilələr həm xarici donorlarla, həm də yerli fiziki şəxslərlə bağlanmış ola bilər.

Müqavilələrin kimlərlə bağlandığına dair siyahı belə dəqiqləşdirilib:

• Beynəlxalq xeyriyyə, humanitar və digər ictimai təşkilatlar;
• İdman assosiasiyaları, federasiyaları və komitələri;
• Maliyyə-kredit institutları;
• Xarici dövlətlər və onların nümayəndəlikləri;
• Gürcüstanda qeydiyyatdan keçmiş hüquqi şəxslər;
• Habelə yerli fiziki şəxslərlə əməkdaşlıq çərçivəsində 2024-cü ildən bağlanmış bütün müqavilələr, o cümlədən qrant müqavilələri;

• Bu sənədlərə edilən bütün dəyişikliklər.

Büro bu təşkilatlardan yuxarıda sadalanan tərəflərlə əməkdaşlıq çərçivəsində bütün müqavilə, razılaşma və dəyişikliklərə dair sənədləri, həmçinin bunlarla bağlı hər növ maliyyə və hüquqi sənədi təqdim etməyi tələb edir.

Buraya daxildir:

• Maliyyə vəsaitlərinin ödəniş qrafikləri;
• Alınan pul və maddi dəyərlərin detallı siyahısı;
• Təhvil-təslim aktları;
• Maaş cədvəlləri;
• Müqavilə çərçivəsində fəaliyyətlər haqqında geniş məlumat – fəaliyyətin təsviri, məqsədi, həyata keçirildiyi tarix, yer, zaman, benefisiarlar və iştirak edən şəxslərin adları;
• Fəaliyyətin təsdiqləyici foto və video materialları;
• Həmçinin iştirakçılar və benefisiarların ad, soyad və şəxsi identifikasiya nömrələri.

Məhkəmə qərarı üç qanuna əsaslanır:

1. Korrupsiyaya Qarşı Qanun;
2. Siyasi Partiyalar haqqında Qanun (“Vətəndaşların siyasi birləşmələri haqqında”);
3. Qrantlar haqqında Qanun.

Maraqlıdır ki, bu qərarda nə 2024-cü ildə qəbul olunmuş “Agentlər haqqında Qanun” (formal olaraq “Şəffaflıq Qanunu”), nə də ABŞ-ın “Xarici Agentlərin Qeydiyyatı Aktı” (FARA) göstərilməyib.