Yaponiya Gürcüstan hökumətindən xahiş edib ki, Yaponiyanın vətəndaşları üçün Gürcüstan ərazisində lisenziyalaşdırılmış onlayn kazinolara çıxışı məhdudlaşdırsın.

Bu, Tokionun qeyri-qanuni onlayn qumar oyunlarına qarşı genişmiqyaslı kampaniyasının bir hissəsidir.

Məsələ ilə bağlı Gürcüstan hökumətinin cavabı hələlik məlum deyil.

Kyodo agentliyinin Yaponiyadakı hökumət mənbəsinə istinadən verdiyi məlumata görə, bu cür müraciət daha yeddi ölkə və əraziyə də göndərilib: Kanada, Kosta-Rika, Malta, Anjuanın adası (Komor arxipelaqında), Kurasao (Niderland Krallığının tərkib hissəsi), eləcə də Böyük Britaniyanın dənizaşırı əraziləri – Cəbəllütariq və Men adası.

Yaponiyada xarici saytlarda qumar oyunlarında iştirak qanunsuz sayılır, lakin hökumətin verdiyi məlumata əsasən, təkcə 2024-cü ildə yapon vətəndaşlar beynəlxalq idman mərc oyunlarına təxminən 6,45 trilyon yen (təqribən 45 milyard ABŞ dolları) xərcləyiblər – bu rəqəm yerli onlayn platformalarda qoyulan mərclərlə müqayisədə beş dəfə çoxdur.

Məşhur şəxslərin və professional idmançıların onlayn kazinolarda oynadığına dair xəbərlərin cəmiyyətdə narahatlıq doğurmasının fonunda, Yaponiyanın parlamentinin aşağı palatası iyun ayında qeyri-qanuni onlayn qumar oyunlarına qarşı qaydaların sərtləşdirilməsini nəzərdə tutan qanun layihəsini qəbul edib.

Yaponiyada hələ də onlayn qumar oyunlarının demək olar ki, bütün formaları qadağandır – istisna yalnız lotereyalar, at yarışları, motosiklet və kater yarışlarıdır. Yaponiya vətəndaşları üçün əlçatan olan 40 populyar onlayn kazinonun təhlili göstərdi ki, onların hamısı xaricdə lisenziyalaşdırılıb və yalnız 70%-i Kurasaoda lisenziya alıb.