Gürcüstanda 140,5 min nəfər 600 laridən az maaş alır.

Bu barədə PMCG tərəfindən aparılmış tədqiqatda qeyd olunur. Konkret olaraq, 2025-ci ilin birinci rübünün məlumatına əsasən, Gürcüstanda ümumilikdə 937 min nəfər əmək haqqı alan şəxs qeydə alınıb, onlardan 15%-i 600 lariyə qədər, 22%-i 600-1199 lari arası, 33%-i 1200-2399 lari arası, 29%-i isə 2400 laridən yuxarı əmək haqqı alır.

Tədqiqatda göstərilir ki, 2019-cu ilin birinci rübündən 2025-ci ilin birinci rübünə qədər Gürcüstanda nominal orta əmək haqları sabit şəkildə artıb. Daha dəqiq desək, 2019-cu ilin birinci rübündə orta əmək haqqı təxminən 1,093 lari olduğu halda, 2024-cü ilin dördüncü rübündə 2,218 lariyə çatıb – bu, demək olar ki, ikiqat artım deməkdir.

Lakin PMCG-nin izahına əsasən, inflyasiya nəzərə alındıqda, real əmək haqlarının artımı daha mülayim olub – konkret olaraq, orta real əmək haqqı 2019-cu ilin birinci rübündə 934 lari olduğu halda, 2024-cü ilin dördüncü rübündə 1,400 lariyə çatıb.

Bununla yanaşı, son məlumatlara görə, aylıq maaşı 0-dan 600 lariyə qədər olanların sayı 2021-ci ildən bəri davamlı olaraq azalıb və nəticədə, 2025-ci ilin birinci rübündə bu göstərici 2021-ci ilin eyni dövrü ilə müqayisədə 40,3% azalıb. Bundan əlavə, 600-1199 lari arası maaş alanların sayı da azalıb – 17,7%.

“Əksinə, 1,200-2,399 lari arası əmək haqqı alanların sayı 2025-ci ilin birinci rübündə artıb, baxmayaraq ki, 2024-cü ilin ikinci rübündə bu qrupda azalma müşahidə olunurdu. Lakin ən yüksək artım 2,400 lari və daha çox əmək haqqı alan şəxslər arasında qeydə alınıb – bu kateqoriyada olan insanların sayı 2025-ci ilin birinci rübündə 2021-ci ilin birinci rübü ilə müqayisədə demək olar ki, iki dəfə artıb,” – tədqiqatda deyilir .