Dövlət qulluqçularının müstəqil peşəkar ittifaqı – “Konstitusiyanın 78-ci maddəsi”, Tbilisidə, Vağzal meydanı yaxınlığında,

Tevdore Mğvdeli küçəsində qəzalı binanın fasadının çökməsi nəticəsində 2 nəfərin ölməsi ilə bağlı hadisəyə münasibət bildirib.

Tbilisi meri təsdiqləyir ki, binanın qəzalı vəziyyətdə olması barədə məlumatlı idilər, lakin bildirirlər ki, bina sahiblərinin hamısı onun dəyişdirilməsinə razı olmayıb. Bu arqumentə cavab olaraq “Konstitusiyanın 78-ci maddəsi” 2 il əvvəl Tbilisi Şurası tərəfindən qəbul edilən qərara istinad edir. Qərara əsasən, bələdiyyə artıq bütün mənzil sahiblərinin razılığı olmadan belə qəzalı binaların əvəzlənməsi prosesinə başlaya bilər.

“Tbilisi meriyası və Didube rayon rəhbərliyi bu binanın qəza vəziyyətdə olduğunu bilirdi, hətta qəza səviyyəsi də müəyyən olunmuşdu. Kaxa Kaladze isə bu gün hələ də tək bir arqumentə – 100%-lik razılığın olmamasına – istinad edir. Halbuki, Tbilisi Şurasının 2023-cü il 27 yanvar tarixli №21-1 qərarına əsasən, çoxmənzilli qəzalı binaların əvəzlənməsində bu tələb artıq 2 ildən çoxdur ki, dəyişdirilib”, – deyə “Konstitusiyanın 78-ci maddəsi”də bildirilir.

Həmçinin qeyd edilir ki, qəzalı binanın qarşısında parkinq sahəsi yaradılıb və son 2 ildə ticarət obyektlərinə reklam lövhələri yerləşdirməyə icazə verilib.
“Kaladzenin bəyanatından belə çıxır ki, meriya və şəhər şurasının müvafiq xidmətləri binanın o dərəcədə qəzalı vəziyyətdə olduğunu bilirdilər ki, artıq sökülməsinə ehtiyac var idi. Bu şəraitdə, Tbilisi meri 2024-cü il 27 mayda və 2025-ci il 16 apreldə ticarət obyektlərinə reklam lövhələrinin yerləşdirilməsi üçün icazə verib. Bu məlumatlar Tbilisi meriyasının Memarlıq Xidmətinin rəsmi saytı tas.ge üzərindən açıq şəkildə tapıla bilər (AR11033208 və AR11084015 nömrələri). Həmin binanın qarşısında isə Tbilisi meri tərəfindən zonalı-saatlıq parkinq sahəsi yaradılıb.
Sual yaranır: Tbilisi meri nəyi gözləyirdi? Niyə bu qəzalı binada ticarət obyektlərinin fəaliyyətinə icazə verdi? Niyə çöldə ticarət məhdudlaşdırılmadı? Niyə binanın qarşısında parkinq sahəsi yaradıldı? Hətta sakinlər əvəzləmə proqramına razı olmadıqları halda belə, niyə nə yerli sakinlərin, nə də oradan keçən vətəndaşların həyatı və sağlamlığı qorunmadı?”.

“Konstitusiyanın 78-ci maddəsi”nin sözlərinə görə, bu hadisə də bir daha göstərdi ki, sistem insan həyatına və sağlamlığına qarşı necə biganə və məsuliyyətsizdir.
“Bələdiyyə elə bir mənzil siyasəti formalaşdıra bilmədi ki, insanlar qəzalı evlərin əvəzlənməsi proqramına inamla qoşula bilsinlər. İnsanlar aylıq kompensasiyanın azlığı səbəbindən qərarsız qalıblar – bu gün həmin vəsaitlə ailənin yaşayacağı mənzil kirayələmək demək olar ki, praktik olaraq mümkün deyil.
Bu suallara min cür cavab tapmaq olar, o cümlədən yenə də sakinləri günahlandırmaq, lakin baş verənlər fonunda cəmiyyət aydın görür ki, insan təhlükəsizliyini təmin edən və dövlətin məsuliyyət daşıdığı mexanizmlər yoxdur – nə bina sahibinin, nə də oradan keçən sıravi vətəndaşın, istər uşaq, istər böyüyün.
Biz həyatını itirənlərin ailələrinə başsağlığı veririk. Təəssüf ki, bu hadisə vətəndaşlarımızın həyatının boş yerə qurban getdiyini göstərdi – halbuki bunun qarşısını almaq üçün təkcə seçilmiş şəxslərin məsuliyyəti və hesabatlılığı kifayət edərdi”.

Xatırladaq ki, iyulun 14-də, Vağzal meydanı yaxınlığında, Tevdore Mğvdeli küçəsində yerləşən qəzalı binanın fasadı çöküb və 2 nəfər həlak olub.
Tbilisi meri Kaxa Kaladze bu hadisəni “bədbəxt hadisə” adlandırıb. O bildirib ki, sakinlərə bina sökülənə qədər kirayə mənzillərə köçmək təklif edilib, lakin bütün sakinlər razı olmayıb.

Kaladzenin sözlərinə görə, qəzalı binanın bərpası mümkün deyildi və bu barədə həm meriya, həm də yerli əhali məlumatlı idi.

“Təəssüf ki, bədbəxt hadisə baş verdi. Nəticədə 1 nəfər həyatını itirdi, 1 nəfər isə müalicə alır.
Binaya gəldikdə isə – bu bina qəzalı idi, 5-ci kateqoriya qəzalı hesab olunurdu və bərpası mümkün deyildi. Bu barədə əhali məlumatlı idi. Didube rayon idarəsində bir neçə görüş keçirildi. Sakinlərə proqramda iştirak təklif etdik – bu zaman biz binanın sökülməsi və yeni binanın tikintisini həyata keçirəcəkdik. Bilirsiniz ki, bu cür proqramların həyata keçirilməsi üçün 100% razılıq tələb olunur. Təəssüf ki, buna nail ola bilmədik. Bir neçə razılaşmış ailə kirayəyə köçürülüb, digərləri isə hələlik imtina etdilər.
Qəzalı tikililər bələdiyyədə çoxdur. Təklif etdiyimiz proqram sakinlərə yeni bina tikilənə qədər kirayəyə köçmək imkanı verir”, – deyə Kaladze mediaya bildirib.