Marneuli bələdiyyəsinin Qızılhacılı kəndində yaşayan 60 yaşlı Svetlana Mardəliyeva tək yaşayır. Onun sözlərinə görə, uzun illərdir işləmir və yeganə gəlir mənbəyi pensiyasıdır. Aldığı pensiya nə dərman xərclərini, nə də gündəlik ehtiyaclarını qarşılamağa bəs edir. Svetlana bildirir ki, sosial yardım üçün müraciət etsə də, dövlət ona yardım göstərməyib.

“İşığım yoxdur. 25 ildir qaz balonu işlədirəm. Mən

hara müraciət edim? Hökumət gəlib mənim işimi həll etsin. İşıq dirəyi çox nazikdir, iki körpə uşaq var, naqil qırıla bilər, uşağın başına düşə bilər. Kənd icra nümayəndəliyinə gedirəm, cavab vermirlər. Ceyhuna, Nərimana gedirəm, baxmırlar. Deyirlər, evin uzaqdır. Artıq balon ala bilmirəm, pulum yoxdur. Hər ay balona 50–100 lari verirəm. Yola nə baxan var, nə çınqıl tökən. İşığım kənardan gəlir. İşıq üçün müraciət edirəm, deyirlər, özün alacaqsan. Mənim pulum var? Haradan alım, xəstə insanam. Meriya, Amiran mənim işimə baxmır. Bu məhəlləyə başdan sona qaz çəkilməyib”, – Svetlana Mardəliyeva deyir.


Mardəliyeva qaz olmadığı üçün qış aylarında odundan istifadə edir. Onun sözlərinə görə, son aylarda 4–5 aylıq pensiyasını yığıb odun almaq məcburiyyətində qalıb. 25 il əvvəl tikdiyi ev hələ də qazla təmin edilməyib. Kəndin digər küçələrində qaz olsa da, Svetlananın yaşadığı küçədə bu imkan hələ də yoxdur.


Küçənin yolunun olmaması da digər ciddi problemdir. Svetlana bildirir ki, yağışlı havalarda hərəkət etmək demək olar ki, mümkünsüz olur. Qadın uzun illər ərzində deputatlara və yerli icra nümayəndələrinə müraciət etsə də, onun problemi ilə maraqlanan olmayıb.

Svetlananı həmçinin elektrik xətləri də narahat edir. Dirəklərin olmaması səbəbindən naqillər aşağıdan keçir və kənd sakinləri üçün təhlükə yaradır. Kənd sakini “Energo Pro” şirkətinə müraciət edib, ancaq ona ödəniş həyata keçirildikdən sonra problemin həll olunacağı bildirilib.


Məsələyə aydınlıq gətirmək üçün Qızılhacılı kəndinin deputatı Ceyhun Çovdarovla əlaqə saxladıq. O, “Marneuli” radiosuna bildirdi ki, məsələ ilə bağlı məlumatı var.

“2026-cı ildən Qızılhacılının yollarına asfalt qatının çəkilməsi nəzərdə tutulur. Qeyd olunan məhəlləyə gedən yolun düzəldiləcəyini dəqiq deyə bilmirəm. Ən qısa zamanda bütün bu məsələlər həll olunacaq. Su şirkəti işlədiyi üçün yollarda qazıntı işləri aparılırdı. Demək olar ki, su işləri başa çatır və artıq yolların təmirinə başlanılacaq”, – Ceyhun Çovdarov bildirib.

Deputat əlavə edib ki, bəzi küçələrdə qaz şəbəkəsi yoxdur. O, bu məsələ ilə bağlı Qızılhacılı kəndini qazla təmin edən “Mamedqaz” MMC-nin rəhbərliyi ilə danışıb. Onlar qeyd ediblər ki, həmin küçədə qaz xətləri mövcud deyil. Hazırda layihələndirmə işləri aparılır və bu işlər başa çatdıqdan sonra əhaliyə qaz xətti çəkiləcək.


Qızılhacılı kəndini qazla təmin edən “Mamedqaz” MMC-yə də müraciət etdik. Şirkətin rəhbəri Nəriman Allahverdiyev “Marneuli” radiosuna bildirib ki, hazırda heç bir ailəyə qaz xətti çəkə bilməyəcək. Onun sözlərinə görə, qaz məsələsi ilə bağlı işi məhkəmədədir və məhkəmə qərar verdikdən sonra məsələ yenidən nəzərdən keçiriləcək.

“Mənə deyirlər, heç kimə qaz çəkmə, öz pulunla da iş görmə. Buna görə mənə dəfələrlə SEMEK cərimə yazıb. Qanuna əsasən, kim özü öz pulu ilə iş görürsə, SEMEK-in ona qarışmaq hüququ yoxdur. Mən 1992-ci ildən Qızılhacılıya qaz çəkmişəm. 2020-ci ildə mənə məktub göndəriblər ki, qazı 10 tetri ucuz satmalıyam. Mən də bununla bağlı məhkəməyə müraciət etmişəm. Hələ ki, bu şikayətimə cavab gəlməyib. Cavab gələnədək mən iş görən deyiləm”, – Nəriman Allahverdiyev bildirib.

Hazırda Svetlana ümid edir ki, aidiyyəti qurumlar onun problemlərinə diqqət yetirəcək və həm qaz, həm yol, həm də elektrik məsələləri tezliklə həllini tapacaq.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.