Marneulili gənclər tərəfindən "Rayon" adlı qısametrajlı filmin ikinci hissəsi çəkilib (VIDEO)
16:58 / 14.09.2020
Marneulili gənclər tərəfindən "Rayon" adlı qısametrajlı filmin
ikinci hissəsi çəkilib. Çəkiliş işləri Marneuli şəhəri ilə yanaşı
Kəpənəkçi, Əzizkənd və Tbilisi şəhərində baş tutub.
Filmin əsas mövzusu Marneulidə yaşayan gənclərin həyat tərzidir.
Bir saatlıq filmdə əsasən gənclərin zorla evləndirilməsi və
qaçırılması əks olunub. Film real hadisələr əsasında çəkilib.
Filmin ssenari müəllifi və rejissoru Elmar Xəlilov "Marneuli"
radiosu ilə söhbəti zamanı bildirdi ki, birinci “Rayon” filmi
kriminal hadisələr əsasında çəkilmişdi. Amma ikinci filmin mövzusu
dram janrındadır. Onun sözlərinə görə, bu filmdə sevgi mövzusuna
toxunublar.
"Kəndlərdə olan çəkilişlərmiz ondan ibarət oldu ki, bizim
adət-ənənəyə uyğun olaraq insanlarmız bulaq başına gedərək, su
doldururlar. Çəkdiyimiz filmdə qızla-oğlanın bulaq başında tanış
olurlar və orada görüşürlər. Bulaq başında biz onu lentə aldıq.
Bundan əlavə filmdə cəmiyyətin problemlərini də göstərməyə
çalışdıq. Burada bir neçə problemdən söhbət gedir. Əsas problemlər
zorla evləndirmə və zorla qaçırılmadır", – Elmar
Xəlilov dedi.
Gürcüstanda pandemiya elan olunan zaman ssenarini yazmağa başlayan
Elmar Xəlilov qeyd etdi ki, çəkiliş işləri təxminən bir aya
yekunlaşıb.
"Karantin başlayandan haradasa bir ay sonra ssenarini
yazmağa başladım. Təxminən aprel ayları olardı. Karantin bitdikdən
sonra hissə-hissə filmin çəkilişlərinə başladıq. Çəkilişlərimiz
təxminən bir ay davam etdi. Filmin son tamamlama işləri qalıb,
yaxın vaxtlarda bitəcək."
Elmar Xəlilov onu da qeyd etdi ki, pandemiyaya görə filmin
təqdimatının nə zaman baş tutacacğını dəqiq bilmir.
"Qanuna görə, insanların bir yerə toplaşması
qadağandır. Əgər nə isə olarsa, bu barədə ictimaiyyətə
bildirəcəyik. Pandemiya davam edərsə, o zaman filmin təqdimatını
uzadan deyilik. O zaman “youtube” vasitəsilə
yayımlayacağıq."
Film maliyyə dəstəyi olmadan çəkilib. Xəlilov bildirdi ki,
gələcəkdə yeni filmlərin çəkilişini də planlaşdırırlar.
"Rayon filminin davamını düşünmürük. Ola bilsin növbəti
filmlərimiz digər mövzularda və digər adda olsun. O da filmin
uğurlu olub-olmamasından asılı olacaq."
Qeyd edək ki, filmdə 10 nəfər həvəskar aktyor çəkilib, 5 nəfər isə
epizodlarda iştirak edib.