Azərbaycanın Gürcüstandakı səfirliyi vətəndaşlara xəbərdarlıq edir.
Azərbaycan Respublikasına getmək üçün və ya Səfirlikdə həyata
keçirilən hər-hansı bir xidməti fəaliyyətlə bağlı
vətəndaşlarımızdan və ya soydaşlarımızdan maliyyə vəsaiti (pul)
tələb olunubsa xahiş olunur Səfirliyə dərhal məlumat verəsiniz.
Bu barədə "Marneuli" radiosuna Azərbaycanın Gürcüstandakı
səfirliyindən məlumat verilib.
Həmin məlumatı sizə olduğu kimi təqdim edirik.
"Hörmətli vətəndaşlar və soydaşlar,
Məlum olduğu kimi, koronavirus infeksiyasının yayılmasının
qarşısının alınması məqsədilə Azərbaycan Respublikası ilə Gürcüstan
arasında 2020-ci ilin mart ayının 14-dən etibarən qarşılıqlı
razılaşmaya əsasən sərhədlər müvəqqəti olaraq bağlanmışdır.
Cari ilin mart ayının 14-dən sentyabr ayının 21-dək Gürcüstandan
Azərbaycan Respublikasına 3455 nəfər təxliyə olunmuşdur. Təxliyə
olunan 3455 nəfərdən 1534-ü Azərbaycan Respublikasının, 1861-i
Gürcüstan və 60-ı isə davamlı əsasda Azərbaycan Respublikasının
vətəndaşı ilə rəsmi nigahda olan digər ölkələrin
vətəndaşlarıdırlar.
2020-ci ilin 21 sentyabr tarixindən etibarən həm Azərbaycanda,
həmdəki Gürcüstanda koronavirusa yoluxma sayında gözlənilməz artım
olmuşdur. Koronavirusun yayılmasının qarşısının alınması məqsədi
ilə Gürcüstanda qalan vətəndaşlarımızın və onların ailə üzvlərinin
(Gürcüstan və ya digər ölkənin vətəndaşı daxil olmaqla) Azərbaycan
Respublikasına təxliyəsi dayandırılmışdır. Lakin, Səfirliyə daxil
olan ərizələr baxılmaqdadır.
Səfirlik vətəndaşlara və soydaşlara xəbərdarlıq edir!!!
Son vaxtlar Səfirliyə daxil olan məlumatlarda Marneulidə və digər
bölgələrdə yaşayan soydaşlarımızdan (Gürcüstan vətəndaşlarından)
müxtəlif məbləğlərdə vəsait alınması və bu maliyyə vəsaiti əsasında
Səfirlik vasitəsi ilə onların Azərbaycan Respublikasına tezliklə
getməsi vəd olunur.
Azərbaycan Respublikasına getmək üçün və ya Səfirlikdə həyata
keçirilən hər-hansı bir xidməti fəaliyyətlə bağlı
vətəndaşlarımızdan və ya soydaşlarımızdan maliyyə vəsaiti (pul)
tələb olunubsa xahiş olunur Səfirliyə dərhal məlumat verəsiniz.
Diqqətinizə çatdırılır ki, vətəndaşlarımızın və Gürcüstandakı
soydaşlarımızın rifahı üçün çalışan Səfirlik və əməkdaşlarının
adına ləkə salmağa çalışan şəxslərlə bağlı Gürcüstanın
hüquq-mühafizə orqanlarına məlumat veriləcək və onlar ölkə
qanunvericiliyinə uyğun olaraq cinayət məsuliyyətinə cəlb
olunacaqlar!!!", – səfirliyin məlumatında deyilir.
Səfirliyin əlaqə nömrələri:
+995-32-224-30-04 - (şəhər nömrəsi)
+995-577-00-00-38 - (24 saat fəaliyyət göstərən
mobil “Qaynar Xətt” nömrəsi)